Fjalët e urta 18 | ALB Bible Study

Fjalët e urta 18:1 (ALB)
Kush veçohet kërkon kënaqësinë e tij dhe zemërohet kundër gjithë diturisë së vërtetë.

Fjalët e urta 18:2 (ALB)
Budallai nuk gjen kënaqësi te maturia, por vetëm në të vënit në dukje të zemrës së tij.

Fjalët e urta 18:3 (ALB)
Kur vjen i pabesi vjen edhe përçmimi dhe bashkë me humbjen e nderit vjen turpi.

Fjalët e urta 18:4 (ALB)
Fjalët e gojës së një njeriu janë ujëra të thella; burimi i diturisë është si një rrjedhë uji që shkon duke gurgulluar.

Fjalët e urta 18:5 (ALB)
Nuk është mirë të preferosh të pabesin, apo të shkaktosh humbjen e të drejtit në gjyq.

Fjalët e urta 18:6 (ALB)
Buzët e budallait të çojnë në grindje, dhe goja e tij kërkon goditje.

Fjalët e urta 18:7 (ALB)
Goja e budallait është shkatërrimi i tij dhe buzët e tij janë një lak për jetën e tij.

Fjalët e urta 18:8 (ALB)
Fjalët e shpifësit janë si një gjellë shumë e shijshme që zbret thellë në zorrë.

Fjalët e urta 18:9 (ALB)
Edhe ai që është përtac në punën e tij është vëlla i planprishësit.

Fjalët e urta 18:10 (ALB)
Emri i Zotit është një kala e fortë, tek ai turret i drejti dhe gjen siguri.

Fjalët e urta 18:11 (ALB)
Pasuria e kamësit është qyteti i tij i fortë dhe simbas mendimit të tij ajo është si një mur i lartë.

Fjalët e urta 18:12 (ALB)
Përpara shkatërrimit, zemra e njeriut ngrihet, por para lavdisë vjen përulësia.

Fjalët e urta 18:13 (ALB)
Kush jep përgjigje për një çështje para se ta ketë dëgjuar, tregon marrëzinë e tij për turp të vet.

Fjalët e urta 18:14 (ALB)
Fryma e njeriut i jep krahë në sëmundjen e tij, por kush mund ta ngrerë një frymë të demoralizuar?

Fjalët e urta 18:15 (ALB)
Zemra e njeriut të matur fiton dituri, edhe veshi i të urtëve kërkon diturinë.

Fjalët e urta 18:16 (ALB)
Dhurata e njeriut i hap rrugën dhe e çon në prani të të mëdhenjve.

Fjalët e urta 18:17 (ALB)
I pari që mbron çështjen e vet duket sikur ka të drejtë; por pastaj vjen tjetri dhe e shqyrton.

Fjalët e urta 18:18 (ALB)
Fati u jep fund grindjeve dhe i ndan të fuqishmit.

Fjalët e urta 18:19 (ALB)
Një vëlla i fyer është si një qytet i fortë; dhe grindjet janë si shulat e një kalaje.

Fjalët e urta 18:20 (ALB)
Njeriu e ngop barkun me frytin e gojës së tij, ai ngopet me prodhimin e buzëve të tij.

Fjalët e urta 18:21 (ALB)
Vdekja dhe jeta janë nën pushtetin e gjuhës; ata që e duan do të hanë frytet e saj.

Fjalët e urta 18:22 (ALB)
Kush ka gjetur grua ka gjetur një gjë të mirë dhe ka siguruar një favor nga Zoti.

Fjalët e urta 18:23 (ALB)
I varfëri flet duke u lutur, kurse i pasuri përgjigjet me ashpërsi.

Fjalët e urta 18:24 (ALB)
Njeriu që ka shumë miq duhet gjithashtu të tregohet mik, por është një mik që është më i lidhur se një vëlla.

Previous Chapter
« Fjalët e urta 17

Fjalët e urta (ALB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31