Fjalët e urta 15 | ALB Bible Study

Fjalët e urta 15:1 (ALB)
Përgjigja e ëmbël e fashit zemërimin, por fjala therëse e nxit zemërimin.

Fjalët e urta 15:2 (ALB)
Gjuha e të urtëve përdor dijen ndershmërisht, por goja e budallenjve nxjerr marrëzira.

Fjalët e urta 15:3 (ALB)
Sytë e Zotit janë kudo për të shikuar të këqijtë dhe të mirët.

Fjalët e urta 15:4 (ALB)
Një gjuhë e shëndoshë është një dru i jetës, por gjuha e çoroditur e sfilit shpirtin.

Fjalët e urta 15:5 (ALB)
Budallai e përçmon korrigjimin e atit të tij, por ai që e çmon kritikën vepron me zgjuarsi.

Fjalët e urta 15:6 (ALB)
Në shtëpinë e të drejtit ka bollëk të madh, por në të ardhurat e të pabesit ka telashe.

Fjalët e urta 15:7 (ALB)
Buzët e të urtëve përhapin dijen, por nuk vepron kështu zemra e budallenjve.

Fjalët e urta 15:8 (ALB)
Sakrifica e të pabesëve është një neveri për Zotin, por lutja e njerëzve të drejtë i pëlqen atij.

Fjalët e urta 15:9 (ALB)
Rruga e të pabesit është një neveri për Zotin, por ai do atë që ndjek drejtësinë.

Fjalët e urta 15:10 (ALB)
Një qortim i rëndë pret atë që braktis rrugën e drejtë, ai që urren kritikën ka për të vdekur.

Fjalët e urta 15:11 (ALB)
Sheoli dhe Abadoni janë para Zotit; ca më tepër janë zemrat e bijve të njerëzve!

Fjalët e urta 15:12 (ALB)
Tallësi nuk e do atë që e kritikon; ai nuk shkon tek të urtët.

Fjalët e urta 15:13 (ALB)
Një zemër e gëzuar e bën të lumtur fytyrën, por nga pikëllimi i zemrës fryma dërrmohet.

Fjalët e urta 15:14 (ALB)
Zemra e njeriut me mend kërkon dijen, por goja e budallenjve ushqehet me marrëzi.

Fjalët e urta 15:15 (ALB)
Të gjitha ditët e të varfërit janë të këqija, por për një zemër të kënaqur ka festë përherë.

Fjalët e urta 15:16 (ALB)
Më mirë pak me frikën e Zotit, se sa një thesar i madh me shqetësime.

Fjalët e urta 15:17 (ALB)
Më mirë një pjatë me perime në të cilën ka dashuri se sa një ka i majmur në të cilin ka urrejtje.

Fjalët e urta 15:18 (ALB)
Njeriu gjaknxehtë nxit grindje, por ai që nuk zemërohet shpejt i qetëson grindjet.

Fjalët e urta 15:19 (ALB)
Rruga e përtacit është si një gardh ferrash, por shtegu i njerëzve të drejtë është i sheshtë.

Fjalët e urta 15:20 (ALB)
Biri i urtë gëzon të atin, por njeriu budalla përçmon të ëmën.

Fjalët e urta 15:21 (ALB)
Marrëzia është gëzim për atë që nuk ka mend, por njeriu që ka mend ecën drejt.

Fjalët e urta 15:22 (ALB)
Planet dështojnë ku nuk ka arsye, por realizohen atje ku ka një mori këshilltarësh.

Fjalët e urta 15:23 (ALB)
Një njeri ndjen gëzim kur mund të jap një përgjigje dhe sa e mirë është fjala që thuhet në kohën e duhur!

Fjalët e urta 15:24 (ALB)
Njeriun e matur rruga e jetës e çon lart në mënyrë që të evitojë Sheolin poshtë.

Fjalët e urta 15:25 (ALB)
Zoti do të shkatërrojë shtëpinë e krenarëve, por do t’i bëjë të qëndrueshëm kufijtë e gruas së ve.

Fjalët e urta 15:26 (ALB)
Mendimet e këqija janë të neveritshme për Zotin, por fjalët e ëmbla janë të pastra.

Fjalët e urta 15:27 (ALB)
Kush lakmon fitime vë në rrezik shtëpinë e vet, por ai që i urren dhuratat ka për të jetuar.

Fjalët e urta 15:28 (ALB)
Zemra e të drejtit mendon thellë se si duhet të përgjigjet, por goja e të pabesit vjell gjëra të këqija.

Fjalët e urta 15:29 (ALB)
Zoti u rri larg të pabesëve, por dëgjon lutjet e të drejtëve.

Fjalët e urta 15:30 (ALB)
Drita e syve gëzon zemrën, një lajm i mirë i fortëson kockat.

Fjalët e urta 15:31 (ALB)
Veshi që e dëgjon kritikën e jetës ka për të qëndruar bashkë me të urtët.

Fjalët e urta 15:32 (ALB)
Kush nuk pranon qortimin e përçmon vetë shpirtin e tij, por ai që dëgjon qortimin bëhet më i urtë.

Fjalët e urta 15:33 (ALB)
Frika e Zotit është një mësim diturie, dhe përpara lavdisë vjen përulësia.

Previous Chapter
« Fjalët e urta 14

Fjalët e urta (ALB) Chapter Selection

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31