Gjoni 8 | ALB Bible Study

Gjoni 8:1 (ALB)
Dhe Jezusi shkoi në malin e Ullinjve.

Gjoni 8:2 (ALB)
Por, si zbardhi dita, u kthye përsëri në tempull dhe gjithë populli erdhi tek ai; dhe ai u ul dhe i mësonte.

Gjoni 8:3 (ALB)
Atëherë farisenjtë dhe skribët i prunë një grua që ishte kapur duke shkelur kurorën dhe, mbasi e vunë në mes,

Gjoni 8:4 (ALB)
i thanë Jezusit: “Mësues, kjo grua është kapur në flagrancë, duke shkelur kurorën.

Gjoni 8:5 (ALB)
Por në ligj Moisiu na ka urdhëruar të vriten me gurë gra të tilla, por ti ç’thua?.”

Gjoni 8:6 (ALB)
Flisnin kështu për ta vënë në provë dhe për të pasur diçka për ta paditur. Por Jezusi, duke u shtënë se nuk dëgjoi, u përkul dhe shkruante me gisht në dhe.

Gjoni 8:7 (ALB)
Dhe, kur ata vazhdonin ta pyesnin, ai u drejtua dhe u tha atyre: “Kush nga ju është pa mëkat, le ta hedhë i pari gurin kundër saj!.”

Gjoni 8:8 (ALB)
Pastaj u përkul përsëri dhe shkruante në dhe.

Gjoni 8:9 (ALB)
Atëherë ata, e dëgjuan këtë dhe të bindur nga ndërgjegjja, u larguan një nga një, duke filluar nga më të vjetrit e deri te të fundit; kështu Jezusi mbeti vetëm me atë grua, që qëndronte atje në mes.

Gjoni 8:10 (ALB)
Jezusi atëherë u ngrit dhe, duke mos parë tjetër përveç gruas, i tha: “O grua, ku janë ata që të paditnin? Askush nuk të dënoi?.”

Gjoni 8:11 (ALB)
Dhe ajo u përgjigj: “Askush, Zot.” Atëherë Jezusi i tha: “As unë nuk të dënoj; shko dhe mos mëkato më.”

Gjoni 8:12 (ALB)
Dhe Jezusi u foli atyre përsëri duke thënë: “Unë jam drita e botës; kush më ndjek nuk do të ecë në errësirë, por do të ketë dritën e jetës.”

Gjoni 8:13 (ALB)
Atëherë farisenjtë i thanë: “Ti dëshmon për vetveten; dëshmimi yt nuk është i vërtetë.”

Gjoni 8:14 (ALB)
Jezusi u përgjigj dhe u tha atyre: “Edhe pse dëshmoj për vetvete, dëshmimi im është i vërtetë, sepse unë e di nga kam ardhur e ku po shkoj; ju, përkundrazi, nuk e dini as nga vij dhe as ku po shkoj.

Gjoni 8:15 (ALB)
Ju gjykoni sipas mishit, unë nuk gjykoj asnjeri.

Gjoni 8:16 (ALB)
Por, edhe kur gjykoj, gjykimi im është i vërtetë, sepse unë nuk jam vetëm, por jam unë dhe Ati që më dërgoi.

Gjoni 8:17 (ALB)
Edhe në ligjin tuaj është shkruar se dëshmimi i dy njerëzve është i vërtetë.

Gjoni 8:18 (ALB)
Unë jam ai që dëshmoj për vetvete dhe Ati që më ka dërguar dëshmon për mua.”

Gjoni 8:19 (ALB)
Atëherë i thanë: “Ku është Ati yt?.” Jezusi u përgjigj: “Ju nuk më njihni as mua, as Atin tim; po të më njihnit mua, do të njihnit edhe Atin tim.”

Gjoni 8:20 (ALB)
Jezusi i shprehu këto fjalë në vendin e thesarit, duke mësuar në tempull dhe askush nuk e kapi, sepse nuk i kishte ardhur akoma ora.

Gjoni 8:21 (ALB)
Jezusi, pra, u tha atyre përsëri: “Unë po shkoj dhe ju do të më kërkoni, dhe do të vdisni në mëkatin tuaj. Atje ku shkoj unë, ju nuk mund të vini.”

Gjoni 8:22 (ALB)
Prandaj Judenjtë thoshnin: “Mos don të vrasë veten, sepse thotë: "Ku shkoj unë, ju nuk mund të vini"?.”

Gjoni 8:23 (ALB)
Dhe ai u tha atyre: “Ju jeni nga këtu poshtë, kurse unë jam nga atje lart; ju jeni prej kësaj bote, unë nuk jam prej kësaj bote.

Gjoni 8:24 (ALB)
Prandaj ju thashë se ju do të vdisni në mëkatet tuaja, sepse po të mos besoni se unë jam, ju do të vdisni në mëkatet tuaja.”

Gjoni 8:25 (ALB)
Atëherë ata i thanë: “Kush je ti?.” Dhe Jezusi u tha atyre: “Pikërisht atë që ju thashë.

Gjoni 8:26 (ALB)
Shumë gjëra kam për të thënë e për të gjykuar lidhur me ju; por ai që më ka dërguar është i vërtetë dhe gjërat që kam dëgjuar nga ai, ia them botës.”

Gjoni 8:27 (ALB)
Ata nuk e kuptuan se ai po u fliste atyre për Atin.

Gjoni 8:28 (ALB)
Atëherë Jezusi u tha atyre: “Kur ta keni lartuar Birin e njeriut, atëherë do të njihni se unë jam, dhe se nuk bëj asgjë prej vetvetes, por i them këto gjëra ashtu si Ati më ka mësuar.

Gjoni 8:29 (ALB)
Dhe ai që më ka dërguar është me mua; Ati s’më ka lënë vetëm, sepse bëj vazhdimisht gjërat që i pëlqejnë.”

Gjoni 8:30 (ALB)
Ndërsa ai thoshte këto gjëra, shumë veta besuan në të.

Gjoni 8:31 (ALB)
Atëherë Jezusi u tha Judenjve që besuan në të: “Nëse do të qëndroni në fjalën time, jeni me të vërtetë dishepujt e mi;

Gjoni 8:32 (ALB)
do ta njihni të vërtetën dhe e vërteta do t’ju bëjë të lirë.”

Gjoni 8:33 (ALB)
Ata iu përgjigjën: “Ne jemi pasardhës të Abrahamit dhe s’kemi qenë kurrë sk-llevër të askujt; si mund të thuash ti: "Do të bëheni të lirë"?.”

Gjoni 8:34 (ALB)
Jezusi u përgjigj atyre: Në të vërtetë, në të vërtetë po ju them: Kush bën mëkatin është skllav i mëkatit.

Gjoni 8:35 (ALB)
Por skllavi nuk rri përgjithmonë në shtëpi; ndërsa biri rri përgjithmonë.

Gjoni 8:36 (ALB)
Pra, nëse Biri do t’ju bëjë të lirë, do të jeni me të vërtetë të lirë.”

Gjoni 8:37 (ALB)
“Unë e di se jeni pasardhësit e Abrahamit, por ju kërkoni të më vrisni, sepse fjala ime nuk gjen vend në ju.

Gjoni 8:38 (ALB)
Unë flas për ç’kam parë tek Ati im, dhe ju bëni gjërat që keni parë tek ati juaj.”

Gjoni 8:39 (ALB)
Ata, duke u përgjigjur, i thanë: “Ati ynë është Abrahami.” Jezusi u tha atyre: “Po të ishit bij të Abrahamit, do të bënit veprat e Abrahamit;

Gjoni 8:40 (ALB)
por ju tani kërkoni të më vrisni mua, që ju kam folur të vërtetën që kam dëgjuar nga Perëndia; Abrahami këtë nuk e bëri.

Gjoni 8:41 (ALB)
Ju bëni veprat e atit tuaj.” Prandaj ata i thanë: “Ne nuk lindëm nga kurvërimi; ne kemi një Atë të vetëm: Perëndinë.”

Gjoni 8:42 (ALB)
Atëherë Jezusi u tha atyre: “Po të ishte Perëndia Ati juaj, ju do të më donit, sepse kam dalë dhe kam ardhur nga Perëndia; nuk kam ardhur, pra, nga vetja ime, por ai më ka dërguar.

Gjoni 8:43 (ALB)
Përse nuk e kuptoni thënien time? Sepse nuk mund të dëgjoni fjalën time.

Gjoni 8:44 (ALB)
Ju jeni nga djalli, që është ati juaj, dhe doni të bëni dëshirat e atit tuaj; ai ishte vrasës që nga fillimi dhe nuk qëndroi në të vërtetën, sepse në të nuk ka të vërtetë. Kur thotë të rrema, flet nga vetvetja, sepse është gënjeshtar dhe ati i rrenës.

Gjoni 8:45 (ALB)
Kurse mua, duke qenë se ju them të vërtetën, nuk më besoni.

Gjoni 8:46 (ALB)
Cili nga ju më bind për mëkat? Nëse flas të vërtetën, përse nuk më besoni?

Gjoni 8:47 (ALB)
Kush është prej Perëndisë, i dëgjon fjalët e Perëndisë; prandaj ju nuk dëgjoni, se nuk jeni prej Perëndisë.”

Gjoni 8:48 (ALB)
Atëherë Judenjtë iu përgjigjën dhe i thanë: “A nuk themi me të drejtë se ti je Samaritan dhe se ke një demon?.”

Gjoni 8:49 (ALB)
Jezusi u përgjigj: “Unë s’kam një demon, por nderoj Atin tim; ju përkundrazi më çnderoni.

Gjoni 8:50 (ALB)
Tani unë nuk kërkoj lavdinë time, ka kush e kërkon dhe gjykon.

Gjoni 8:51 (ALB)
Në të vërtetë, në të vërtetë po ju them se ai që zbaton fjalën time, nuk do ta shohë kurrë vdekjen, përjetë.”

Gjoni 8:52 (ALB)
Pra Judenjtë i thanë: “Tani njohim se ti ke një demon. Abrahami dhe profetët kanë vdekur, kurse ti thua: "Kur njëri zbaton fjalën time, nuk do ta shijojë kurrë vdekjen, përjetë".

Gjoni 8:53 (ALB)
Ti qenke më i madh se ati ynë Abraham, i cili ka vdekur? Edhe profetët kanë vdekur; kush pretendon se je?.”

Gjoni 8:54 (ALB)
Jezusi u përgjigj: “Në qoftë se unë e përlëvdoj veten, lavdia ime s’është asgjë. Éshtë Ati im ai që më përlëvdon, për të cilin ju thoni se është Perëndia juaj.

Gjoni 8:55 (ALB)
Por ju ende s’e keni njohur, kurse unë e njoh dhe, po të thoja se nuk e njoh, do të isha një gënjeshtar si ju; por unë e njoh dhe e zbatoj fjalën e tij.

Gjoni 8:56 (ALB)
Abrahami, ati juaj, ngazëllohej në shpresën që të shihte ditën time; e pa dhe u gëzua.”

Gjoni 8:57 (ALB)
Judenjtë, pra, i thanë: “Ti ende nuk je pesëdhjetë vjeç dhe e paske parë Abrahamin?.”

Gjoni 8:58 (ALB)
Jezusi u tha atyre: “Në të vërtetë, në të vërtetë unë po ju them: para se të kishte lindur Abrahami, unë jam.”

Gjoni 8:59 (ALB)
Atëherë ata morën gurë, që t’i hidhnin kundër tij; por Jezusi u fsheh dhe doli nga tempulli, duke kaluar midis tyre; dhe kështu u largua.

Gjoni 8 ALB

Gjoni (ALB) Chapter Selection

ALB Book Selection List