Gjoni 11:1 (ALB)
Ishte atëherë i sëmurë një farë Llazari nga Betania, fshati i Marisë dhe i Martës, motrës së saj.

Gjoni 11:2 (ALB)
Maria ishte ajo që e vajosi me vaj erëkëndëshëm Zotin dhe ia fshiu këmbët me flokët e saj; dhe vëllai i saj, Llazari, ishte i sëmurë.

Gjoni 11:3 (ALB)
Prandaj motrat i dërguan fjalë Jezusit: “Zot, ja, ai që ti e do shumë është i sëmurë.”

Gjoni 11:4 (ALB)
Dhe Jezusi si dëgjoi këto tha: “Kjo sëmundje nuk është për vdekje, po për lavdinë e Perëndisë, që nëpërmjet saj të përlëvdohet Biri i Perëndisë.”

Gjoni 11:5 (ALB)
Por Jezusi e donte Martën, motrën e saj dhe Llazarin.

Gjoni 11:6 (ALB)
Kur dëgjoi se Llazari ishte i sëmurë, qëndroi edhe dy ditë në vendin ku ishte.

Gjoni 11:7 (ALB)
Pastaj u tha dishepujve: “Të kthehemi përsëri në Jude.”

Gjoni 11:8 (ALB)
Dishepujt i thanë: “Mësues, pak më parë Judenjtë kërkonin të të vrisnin me gurë dhe ti po shkon përsëri atje?.”

Gjoni 11:9 (ALB)
Jezusi u përgjigj: “Nuk janë vallë dymbëdhjetë, orët e ditës? Kur dikush ecën ditën, nuk pengohet, sepse sheh dritën e kësaj bote,

Gjoni 11:10 (ALB)
por nëse dikush ecën natën, pengohet, sepse drita nuk është në të.”

Gjoni 11:11 (ALB)
Mbasi i tha këto gjëra, shtoi: “Mikun tonë, Llazarin e ka zënë gjumi, por unë po shkoj ta zgjoj.”

Gjoni 11:12 (ALB)
Atëherë dishepujt e tij thanë: “Zot, po të flejë, do të shpëtojë.”

Gjoni 11:13 (ALB)
Por Jezusi u kishte folur për vdekjen e tij, kurse ata pandehnin se kishte folur për fjetjen e gjumit.

Gjoni 11:14 (ALB)
Atëherë Jezusi u tha atyre haptas: “Llazari ka vdekur.

Gjoni 11:15 (ALB)
Edhe unë gëzohem për ju që nuk isha atje, që të besoni; por le të shkojmë tek ai.”

Gjoni 11:16 (ALB)
Atëherë Thomai, i quajtur Binjaku, u tha bashkëdishepujve: “Të shkojmë edhe ne, që të vdesim me të.”

Gjoni 11:17 (ALB)
Kur arriti Jezusi, pra, gjeti që Llazari ishte që prej katër ditësh në varr.

Gjoni 11:18 (ALB)
Por Betania ishte rreth pesëmbëdhjetë stade larg Jeruzalemit.

Gjoni 11:19 (ALB)
Dhe shumë Judenj kishin ardhur te Marta dhe te Maria për t’i ngushëlluar për vëllanë e tyre.

Gjoni 11:20 (ALB)
Marta, pra, si e mori vesh se po vinte Jezusi, i doli përpara; kurse Maria ishte ulur në shtëpi.

Gjoni 11:21 (ALB)
Marta i tha Jezusit: “Zot, po të ishe këtu, im vëlla nuk do të kishte vdekur,

Gjoni 11:22 (ALB)
por edhe tani e di se të gjitha ato që ti i kërkon Perëndisë, Perëndia do të t’i japë.”

Gjoni 11:23 (ALB)
Jezusi i tha: “Yt vëlla do të ringjallet.”

Gjoni 11:24 (ALB)
Marta i tha: “E di se do të ringjallet, në ringjallje, ditën e fundit.”

Gjoni 11:25 (ALB)
Jezusi i tha: “Unë jam ringjallja dhe jeta; ai që beson në mua, edhe sikur të duhej të vdesë do të jetojë.

Gjoni 11:26 (ALB)
Dhe ai që jeton e beson në mua, nuk do të vdesë kurrë përjetë. A e beson këtë?.”

Gjoni 11:27 (ALB)
Ajo i tha: “Po, Zot, unë besoj se ti je Krishti, Biri i Perëndisë, që duhet të vinte në botë”

Gjoni 11:28 (ALB)
Dhe, si tha kështu, shkoi të thërrasë fshehtas Marinë, motrën e saj, duke thënë: “Mësuesi është këtu dhe po të thërret.”

Gjoni 11:29 (ALB)
Posa e dëgjoi, ajo u çua me nxitim dhe erdhi tek ai.

Gjoni 11:30 (ALB)
Por Jezusi ende nuk kishte arritur në fshat, por ndodhej në vendin ku Marta e kishte takuar.

Gjoni 11:31 (ALB)
Prandaj Judenjtë që ishin me të në shtëpi për ta ngushëlluar, kur panë se Maria u çua me nxitim dhe doli, e ndoqën, duke thënë: “Ajo po shkon te varri për të qarë aty.”

Gjoni 11:32 (ALB)
Sapo Maria arriti te vendi ku ndodhej Jezusi dhe e pa atë, i ra ndër këmbë duke i thënë: “Zot, po të ishe ti këtu, im vëlla nuk do të kishte vdekur.”

Gjoni 11:33 (ALB)
Atëherë Jezusi, kur pa se ajo dhe Judenjtë që kishin ardhur me të po qanin, u psherëtiu në frymë dhe u trondit,

Gjoni 11:34 (ALB)
dhe tha: “Ku e keni vënë?.” Ata i thanë: “Zot, eja e shih!.”

Gjoni 11:35 (ALB)
Jezusi qau.

Gjoni 11:36 (ALB)
Atëherë Judenjtë thanë: “Shih, sa e donte!.”

Gjoni 11:37 (ALB)
Por disa nga ata thanë: “Ky, që i hapi sytë të verbërit, s’mund të bënte që ky të mos vdiste?".

Gjoni 11:38 (ALB)
Prandaj Jezusi, përsëri i tronditur përbrenda, erdhi te varri; por ky ishte një guvë dhe kishte përpara një gur.

Gjoni 11:39 (ALB)
Jezusi tha: “Hiqni gurin!.” Marta, motra e të vdekurit, i tha: “Zot, ai tashmë qelbet, sepse ka vdekur prej katër ditësh.”

Gjoni 11:40 (ALB)
Jezusi i tha: “A nuk të thashë se po të besosh, do të shohësh lavdinë e Perëndisë?.”

Gjoni 11:41 (ALB)
Atëherë ata e hoqën gurin prej vendit ku ishte shtrirë i vdekuri. Dhe Jezusi i ngriti sytë lart dhe tha: “O Atë, të falënderoj që më ke dëgjuar.

Gjoni 11:42 (ALB)
Unë e dija mirë se ti gjithnjë më dëgjon, por i kam thënë këto për turmën që është përreth, që të besojnë se ti më ke dërguar.”

Gjoni 11:43 (ALB)
Dhe, mbasi tha këto, thirri me zë të lartë: “Llazar, eja jashtë!.”

Gjoni 11:44 (ALB)
Atëherë i vdekuri doli, me duart e këmbët të lidhura me rripa pëlhure dhe me fytyrën të mbështjellë në një rizë. Jezusi u tha atyre: “Zgjidheni dhe lëreni të shkojë!.”

Gjoni 11:45 (ALB)
Atëherë shumë nga Judenjtë, që kishin ardhur te Maria dhe kishin parë gjithçka kishte bërë Jezusi, besuan në të.

Gjoni 11:46 (ALB)
Por disa nga ata shkuan te farisenjtë dhe u treguan atyre ç’kishte bërë Jezusi.

Gjoni 11:47 (ALB)
Atëherë krerët e priftërinjve dhe farisenjtë mblodhën sinedrin dhe thanë: “Ç’të bëjmë? Ky njeri po bën shumë shenja.

Gjoni 11:48 (ALB)
Po ta lëmë të vazhdojë kështu, të gjithë do të besojnë në të, do të vijnë Romakët dhe do të shkatërrojnë vendin dhe kombin tonë.”

Gjoni 11:49 (ALB)
Por një nga ata, Kajafa, që ishte kryeprifti i atij viti, u tha atyre: “Ju nuk kuptoni asgjë;

Gjoni 11:50 (ALB)
dhe as nuk e konceptoni se është e leverdishme për ne që të vdesë vetëm një njeri për popullin, dhe të mos humbasë gjithë kombi.”

Gjoni 11:51 (ALB)
Por këtë ai nuk e tha nga vetja; por, duke qenë kryeprift i atij viti, profetizoi se Jezusi duhej të vdiste për kombin,

Gjoni 11:52 (ALB)
dhe jo vetëm për kombin, por edhe për t’i mbledhur në një, bijtë e Perëndisë që ishin të shpërndarë.

Gjoni 11:53 (ALB)
Që nga ajo ditë, pra, ata vendosën ta vrasin.

Gjoni 11:54 (ALB)
Për këtë arsye Jezusi nuk ecte më haptasi midis Judenjve, por u tërhoq në një krahinë afër shkretëtirës, në një qytet që quhej Efraim dhe aty rrinte me dishepujt e tij.

Gjoni 11:55 (ALB)
Dhe Pashka e Judenjve ishte afër dhe shumë veta nga ajo krahinë u ngjitën në Jeruzalem përpara Pashkës për t’u pastruar.

Gjoni 11:56 (ALB)
E kërkonin, pra, Jezusin dhe, duke qëndruar në tempull, thoshnin në mes tyre: “Si ju duket juve? A do të vijë ai për festë?.”

Gjoni 11:57 (ALB)
Krerët e priftërinjve dhe farisenjtë kishin dhënë urdhër që, po ta dinte ndokush se ku ishte ai, të sinjalizonte që ta kapnin.
Previous Chapter
« Gjoni 10
Next Chapter
Gjoni 12 »

Gjoni (ALB) Chapter Selection

ALB Book Selection List

View full list of ALB Bible Books and Chapters