Gjoni 15:1 (ALB)
“Unë jam hardhia e vërtetë dhe Ati im është vreshtari.

Gjoni 15:2 (ALB)
Çdo shermend që nuk jep fryt në mua, ai e heq; kurse çdo shermend që jep fryt, ai e krasit që të japë edhe më shumë fryt.

Gjoni 15:3 (ALB)
Ju tashmë jeni të pastër, për shkak të fjalës që ju kumtova.

Gjoni 15:4 (ALB)
Qëndroni në mua dhe unë do të qëndroj në ju; sikurse shermendi nuk mund të japë fryt nga vetja, po qe se nuk qëndron në hardhi, ashtu as ju, nëse nuk qëndroni në mua.

Gjoni 15:5 (ALB)
Unë jam hardhia, ju jeni shermendet; kush qëndron në mua dhe unë në të, jep shumë fryt, sepse pa mua nuk mund të bëni asgjë.

Gjoni 15:6 (ALB)
Në qoftë se ndokush nuk qëndron në mua, hidhet jashtë si shermendi dhe thahet; pastaj i mbledhin, i hedhin në zjarr dhe digjen.

Gjoni 15:7 (ALB)
Në qoftë se qëndroni në mua dhe fjalët e mia qëndrojnë në ju, kërkoni çfarë të doni dhe do t’ju bëhet.

Gjoni 15:8 (ALB)
Në këtë është përlëvduar Ati im, që të jepni shumë fryt, dhe kështu do të jeni dishepujt e mi.

Gjoni 15:9 (ALB)
Sikurse Ati më ka dashur mua, ashtu edhe unë ju kam dashur juve; qëndroni në dashurinë time.

Gjoni 15:10 (ALB)
Po të zbatoni urdhërimet e mia, do të qëndroni në dashurinë time, sikurse unë i zbatova urdhërimet e Atit tim dhe qëndroj në dashurinë e tij.

Gjoni 15:11 (ALB)
Këto gjëra jua kam thënë që gëzimi im të qëndrojë në ju dhe gëzimi juaj të jetë i plotë.

Gjoni 15:12 (ALB)
Ky është urdhërimi im: ta doni njëri-tjetrin, ashtu si unë ju kam dashur juve.

Gjoni 15:13 (ALB)
Askush s’ka dashuri më të madhe nga kjo: të japë jetën e vet për miqtë e tij.

Gjoni 15:14 (ALB)
Ju jeni miqtë e mi, nëse bëni gjërat që unë ju urdhëroj.

Gjoni 15:15 (ALB)
Unë nuk ju quaj më shërbëtorë, sepse shërbëtori nuk e di ç’bën i zoti; por unë ju kam quajtur miq, sepse ju bëra të njihni të gjitha gjëra që kam dëgjuar nga Ati im.

Gjoni 15:16 (ALB)
Nuk më keni zgjedhur ju mua, por unë ju kam zgjedhur juve; dhe ju caktova të shkoni dhe të jepni fryt, dhe fryti juaj të jetë i qëndrueshëm, që, çfarëdo gjë që t’i kërkoni Atit në emrin tim, ai t’jua japë.

Gjoni 15:17 (ALB)
Këtë ju urdhëroj: ta doni njëri-tjetrin.

Gjoni 15:18 (ALB)
Nëse bota ju urren, ta dini se më ka urryer mua para jush.

Gjoni 15:19 (ALB)
Po të ishit nga bota, bota do të donte të vetët; por sepse nuk jeni nga bota, por unë ju kam zgjedhur nga bota, prandaj bota ju urren.

Gjoni 15:20 (ALB)
Kujtoni fjalën që ju thashë: "Shërbëtori nuk është më i madh se i zoti". Nëse më kanë përndjekur mua, do t’ju përndjekin edhe ju; nëse kanë zbatuar fjalën time, do të zbatojnë edhe tuajën.

Gjoni 15:21 (ALB)
Të gjitha këto gjëra do t’jua bëjnë për shkak të emrit tim, sepse nuk e njohin atë që më ka dërguar.

Gjoni 15:22 (ALB)
Po të mos kisha ardhur dhe të mos u kisha folur atyre, nuk do të kishin faj; por tani ata nuk kanë asnjë shfajësim për mëkatin e tyre.

Gjoni 15:23 (ALB)
Kush më urren mua, urren edhe Atin tim.

Gjoni 15:24 (ALB)
Po të mos kisha bërë në mes tyre vepra që askush tjetër nuk ka bërë, nuk do të kishin faj; por tani, përkundrazi, e kanë parë, dhe më kanë urryer mua dhe Atin tim.

Gjoni 15:25 (ALB)
Por kjo ndodhi që të përmbushet fjala e shkruar në ligjin e tyre: "Më kanë urryer pa shkak".

Gjoni 15:26 (ALB)
Por kur të vijë Ngushëlluesi, që do t’ju dërgoj prej Atit, Fryma e së vërtetës, që del nga Ati im, ai do të dëshmojë për mua.

Gjoni 15:27 (ALB)
Edhe ju, gjithashtu, do të dëshmoni, sepse ishit me mua që nga fillimi.”