Luka 23 | ALB Bible Study

Luka 23:1 (ALB)
Atëherë u ngrit gjithë asambleja dhe e çuan te Pilati.

Luka 23:2 (ALB)
Dhe filluan ta paditin duke thënë: “Këtë ne e gjetëm që përmbyste kombin tonë dhe ndalonte t’i jepeshin taksa Cezarit, duke u vetëquajtur një mbret, Krishti.”

Luka 23:3 (ALB)
Atëherë Pilati e pyeti duke thënë: “A je ti mbreti i Judenjve?.” Dhe Jezusi iu përgjigj dhe tha: “Ti po thua.”

Luka 23:4 (ALB)
Pilati u tha atëherë krerëve të priftërinjve dhe popullit: “Unë nuk po gjej asnjë faj te ky njeri.”

Luka 23:5 (ALB)
Por ata ngulnin këmbë, duke thënë: “Ai po ngre popullin në kryengritje duke mësuar në mbarë Judenë, që nga Galilea e deri këtu.”

Luka 23:6 (ALB)
Atëherë Pilati, kur dëgjoi se u fol për Galilenë, pyeti në se ai njeri ishte Galileas.

Luka 23:7 (ALB)
Dhe kur mori vesh se ai i takonte juridiksionit të Herodit, e dërgoi te Herodi, i cili, ndër ato ditë, ndodhej edhe ai në Jeruzalem.

Luka 23:8 (ALB)
Kur Herodi pa Jezusin, u gëzua shumë; prej shumë kohësh ai donte ta shihte, sepse kishte dëgjuar shumë për të dhe shpresonte të shihte ndonjë mrekulli të kryer prej tij.

Luka 23:9 (ALB)
Ai i drejtoi shumë pyetje, por Jezusi nuk u përgjigj fare.

Luka 23:10 (ALB)
Ndërkaq krerët e priftërinjve dhe skribët rrinin aty dhe e paditnin me furi.

Luka 23:11 (ALB)
Atëherë Herodi, me ushtarët e vet, mbasi e fyu dhe e talli, e veshi me një rrobe të shkëlqyeshme dhe ia riktheu Pilatit.

Luka 23:12 (ALB)
Atë ditë Herodi dhe Pilati u bënë miq me njëri-tjetrin, ndërsa më parë ishin armiq.

Luka 23:13 (ALB)
Atëherë Pilati, mblodhi krerët e priftërinjve, kryetarët dhe popullin,

Luka 23:14 (ALB)
dhe u tha atyre: “Ju më prutë këtë njeri si çoroditës të popullit; dhe ja, unë, pasi e hetova para jush, nuk kam gjetur tek ai asnjë nga fajet për të cilat ju e paditni,

Luka 23:15 (ALB)
dhe as Herodi, sepse na e ktheu përsëri te ne; në fakt ai s’ka bërë asgjë që të meritojë vdekjen.

Luka 23:16 (ALB)
Prandaj, pasi ta fshikullojnë, do ta lëshoj.”

Luka 23:17 (ALB)
Tani me rastin e festës së Pashkës qeveritari duhet të lironte dikë.

Luka 23:18 (ALB)
Por ata, të gjithë njëzeri, bërtitën duke thënë: “Vraje këtë dhe na liro Barabën.”

Luka 23:19 (ALB)
Ky ishte hedhur në burg për një trazirë të bërë në qytet dhe për vrasje.

Luka 23:20 (ALB)
Prandaj Pilati, duke dashur të lëshojë Jezusin, u foli përsëri.

Luka 23:21 (ALB)
Por ata bërtitnin duke thënë: “Kryqëzoje!.”

Luka 23:22 (ALB)
Për të tretën herë ai u tha atyre: “Po ç’të keqe bëri ky? Unë nuk gjeta në të asnjë faj që të meritojë vdekjen. Prandaj, pasi ta fshikullojnë, do ta lëshoj.”

Luka 23:23 (ALB)
Por ata ngulnin këmbë me britma te mëdha duke kërkuar që ta kryqëzonin; dhe britmat e tyre dhe të krerëve të priftërinjve u bënë mbisunduese.

Luka 23:24 (ALB)
Atëherë Pilat vendosi që të bëhej çka ata kërkonin.

Luka 23:25 (ALB)
Dhe ua lëshoi atë që qe burgosur për trazirë dhe vrasje dhe që ata e kishin kërkuar; dhe Jezusin ia dorëzoi vullnetit të tyre.

Luka 23:26 (ALB)
Ndërsa po e çonin, kapën njëfarë Simoni nga Kirena, që po kthehej nga fusha, e ngarkuan me kryqin që ta mbarte pas Jezusit.

Luka 23:27 (ALB)
Dhe e ndiqte një turmë e madhe populli dhe disa gra që hidhëroheshin dhe vajtonin për të.

Luka 23:28 (ALB)
Por Jezusi u kthye nga ato dhe u tha: “O bija të Jeruzalemit, mos qani për mua, por qani për veten tuaj dhe për fëmijët tuaj.

Luka 23:29 (ALB)
Sepse ja, do të vijnë ditët kur do të thuhet: "Lum gratë shterpe dhe lum barqet që nuk kanë pjellë dhe gjinjtë që nuk kanë mëndur!".

Luka 23:30 (ALB)
Atëherë do të fillojnë t’u thonë maleve: "Bini përmbi ne!," dhe kodrave: "Na mbuloni!".

Luka 23:31 (ALB)
Sepse, në se bëhet kështu me drurin e njomë, ç’do të bëhet me të thatin?".

Luka 23:32 (ALB)
Dhe dy të tjerë, që ishin keqbërës, i prunë bashkë me të, për t’i vrarë.

Luka 23:33 (ALB)
Dhe kur arritën në vendin që quhet “Kafka,” aty e kryqëzuan atë dhe keqbërësit, njërin në të djathtë dhe tjetri në të majtë.

Luka 23:34 (ALB)
Dhe Jezusi tha: “O Atë, fali ata sepse nuk dinë ç’bëjnë.” Pastaj, pasi i ndanë rrobat e tij, hodhën short.

Luka 23:35 (ALB)
Dhe populli rrinte aty për të parë; dhe kryetarët me popullin e përqeshnin, duke thënë: “Ai i shpëtoi të tjerët, le të shpëtojë veten, po qe se me të vërtetë është Krishti, i zgjedhuri i Perëndisë.”

Luka 23:36 (ALB)
Edhe ushtarët e tallnin, duke iu afruar dhe duke i ofruar uthull,

Luka 23:37 (ALB)
dhe duke thënë: “Nëse ti je mbreti i Judenjve, shpëto veten.”

Luka 23:38 (ALB)
Përveç kësaj përmbi kryet e tij ishte një mbishkrim me shkronja greke, latine dhe hebraike: "KY ÉSHTÉ MBRETI I JUDENJVE".

Luka 23:39 (ALB)
Tani një nga keqberësit e kryqëzuar e shau duke thënë: “Nëse ti je Krishti, shpëto vetveten dhe neve.”

Luka 23:40 (ALB)
Por ai tjetri duke e përgjigjur e qortoi duke i thënë: “A s’ke frikë nga Perëndia, që je nën të njëjtin dënim?

Luka 23:41 (ALB)
Në realitet, ne me të drejtë jemi dënuar, sepse po marrim ndëshkimin e merituar për ato që kemi kryer, ndërsa ky nuk ka bërë asnjë të keqe.”

Luka 23:42 (ALB)
Pastaj i tha Jezusit: “Zot, kujtohu për mua kur të vish në mbretërinë tënde.”

Luka 23:43 (ALB)
Atëherë Jezusi i tha: “Në të vërtetë po të them: sot do të jesh me mua në parajsë.”

Luka 23:44 (ALB)
Ishte afërsisht ora e gjashtë dhe errësira e mbuloi gjithë vendin deri në orën e nëntë.

Luka 23:45 (ALB)
Dielli u err dhe perdja e tempullit u nda në mes.

Luka 23:46 (ALB)
Dhe Jezusi bërtiti me zë të lartë dhe tha: “O Atë, në duart e tua po e dorëzoj frymën tim!.” Dhe, si tha këto, dha fryma.

Luka 23:47 (ALB)
Atëherë centurioni, kur pa ç’ndodhi, përlëvdoi Perëndinë duke thënë: “Me të vërtetë ky njeri ishte i drejtë!.”

Luka 23:48 (ALB)
Dhe gjithë turma, që ishte mbledhur për të parë ç’po ndodhte, kur e pa këtë, u kthye duke rrahur kraharorin.

Luka 23:49 (ALB)
Të gjithë të njohurit e tij dhe gratë që e kishin ndjekur që nga Galilea qendronin larg, duke parë këto gjëra.

Luka 23:50 (ALB)
Tani ishte një burrë me emër Jozef, që ishte anëtar i sinedrit, njeri i drejtë dhe i mirë;

Luka 23:51 (ALB)
ai nuk kishte miratuar vendimin dhe veprimin e të tjerëve. Ai ishte nga Arimatea, qytet i Judesë dhe priste edhe ai mbretërinë e Perëndisë.

Luka 23:52 (ALB)
Ai iu paraqit Pilatit dhe kërkoi trupin e Jezusit.

Luka 23:53 (ALB)
Dhe, pasi e zbriti poshtë nga kryqi, e mbështolli në një çarçaf dhe e vuri në një varr të gërmuar në shkëmb, ku ende nuk ishte varrosur asnjeri.

Luka 23:54 (ALB)
Ishte dita e Përgatitjes dhe e shtuna po fillonte.

Luka 23:55 (ALB)
Gratë që kishin ardhur me Jezusin nga Galilea duke e ndjekur nga afër, e panë varrin dhe mënyrën se si ishte vënë trupi i Jezusit;

Luka 23:56 (ALB)
pastaj ato u kthyen dhe përgatitën erëra të mira dhe vajra; dhe gjatë së shtunës pushuan, sipas urdhërimit.

Luka 23 ALB

Luka (ALB) Chapter Selection

ALB Book Selection List