Luka 19 | ALB Bible Study

Luka 19:1 (ALB)
Pastaj Jezusi hyri në Jeriko dhe po kalonte nëpër qytet;

Luka 19:2 (ALB)
dhe ja, një njeri i quajtur Zake, i cili ishte kryetari i tagrambledhësve dhe ishte i pasur.

Luka 19:3 (ALB)
Ai kërkonte të shihte kush ishte Jezusi, por nuk mundte për shkak të turmës, sepse ishte i shkurtër nga shtati.

Luka 19:4 (ALB)
Atëherë rendi përpara dhe u ngjit në një fik për ta parë, sepse ai duhet të kalonte andej.

Luka 19:5 (ALB)
Dhe kur Jezusi arriti në atë vend, i çoi sytë, e pa dhe i tha: “Zake, zbrit shpejt poshtë, sepse sot duhet të rri në shtëpinë tënde.”

Luka 19:6 (ALB)
Dhe ai zbriti me nxitim dhe e priti me gëzim.

Luka 19:7 (ALB)
Kur panë këtë, të gjithë murmuritën, duke thënë: “Ai shkoi të rrijë në shtëpinë e një njeriu mëkatar.”

Luka 19:8 (ALB)
Por Zakeu u çua dhe i tha Zotit: “Zot, unë po u jap të varfërve gjysmën e pasurisë sime dhe, po të kem marrë ndonjë gjë nga ndonjëri me mashtrim, do t’ia kthej katërfish.”

Luka 19:9 (ALB)
Dhe Jezusi i tha: “Sot në këtë shtëpi ka hyrë shpëtimi, sepse edhe ky është bir i Abrahamit.

Luka 19:10 (ALB)
Sepse Biri i njeriut erdhi të kërkojë dhe të shpëtojë atë që kishte humbur.”

Luka 19:11 (ALB)
Dhe, ndërsa ata po i dëgjonin këto, Jezusi vazhdoi të tregojë një shëmbëlltyrë, sepse ai ishte afër Jeruzalemit dhe ata mendonin se mbretëria e Perëndisë do të shfaqej menjëherë.

Luka 19:12 (ALB)
Tha, pra: “Një njeri fisnik shkoi në një vend të largët për të marrë në dorëzim një mbretëri e pastaj të kthehej.

Luka 19:13 (ALB)
Dhe, si i thirri dhjetë shërbëtorët e vet, u dha dhjetë mina dhe u tha atyre: "Tregtoni deri sa të kthehem".

Luka 19:14 (ALB)
Por qytetarët e vet e urrenin dhe i dërguan pas një përfaqësi duke thënë: "Nuk duam që ky të mbretërojë përmbi ne".

Luka 19:15 (ALB)
Dhe kur ai u kthye, pasi e mori në dorëzim mbretërinë, urdhëroi t’i thërresin ata shërbëtorët, të cilëve u kishte dhënë paratë për të marrë vesh sa kishte fituar secili duke tregtuar.

Luka 19:16 (ALB)
Atëherë doli i pari dhe tha: "Zot, mina jote dha dhjetë mina të tjera";

Luka 19:17 (ALB)
dhe ai tha: "Mirë, o shërbëtor i mirë, sepse ke qenë besnik në gjëra të vogëla, merr sundimin mbi dhjetë qytete".

Luka 19:18 (ALB)
Pastaj erdhi i dyti duke thënë: "Zot, mina jote dha edhe pesë mina";

Luka 19:19 (ALB)
dhe ai i tha edhe këtij: "Edhe ti ji sundimtar mbi pesë qytete".

Luka 19:20 (ALB)
Atëherë erdhi një tjetër i cili tha: "Zot, ja mina jote që e ruajta në një shami,

Luka 19:21 (ALB)
sepse kisha frikë nga ti, që je njeri i rreptë; ti merr atë që nuk ke vënë dhe korr atë që nuk ke mbjellë".

Luka 19:22 (ALB)
Dhe zoti i tij i tha: "Do të të gjykoj nga vetë fjalët e tua, o shërbëtor i keq; ti e dije se jam njeri i rreptë, që marr atë që nuk kam vënë dhe korr atë që nuk kam mbjellë;

Luka 19:23 (ALB)
përse nuk e vure paranë time në bankë që, kur të kthehem, ta marr bashkë me përqindje?".

Luka 19:24 (ALB)
Pastaj u tha të pranishmëve: "Merrjani minën dhe ia jepni atij që ka dhjetë mina".

Luka 19:25 (ALB)
Dhe ata i thanë: "Zot, po ai ka dhjetë mina".

Luka 19:26 (ALB)
Unë po ju them se atij që ka, do t’i jepet; por atij që s’ka do t’i hiqet edhe ajo që ka.

Luka 19:27 (ALB)
Veç kësaj, i sillni këtu armiqtë e mi, të cilët nuk donin që unë të mbretëroja mbi ta dhe i vritni përpara meje!".”

Luka 19:28 (ALB)
Mbasi tha këto gjëra, ai shkoi përpara duke u ngjitur në Jeruzalem.

Luka 19:29 (ALB)
Dhe, si iu afrua Betfagës dhe Betanias, afër malit që quhet i Ullinjve, dërgoi dy nga dishepujt e vet,

Luka 19:30 (ALB)
duke u thënë: “Shkoni në fshatin përballë dhe, kur të hyni, do të gjeni aty një kërriç të lidhur, mbi të cilin nuk ka hipur kurrë njeri; zgjidheni atë dhe ma sillni.

Luka 19:31 (ALB)
Dhe nëse ndokush ju pyet: "Përse po e zgjidhni?," u thoni atyre kështu: Zoti ka nevojëë".”

Luka 19:32 (ALB)
Dhe ata që ishin dërguar shkuan dhe e gjetën ashtu siç u kishte thënë.

Luka 19:33 (ALB)
Dhe, ndërsa ata po e zgjidhnin kërriçin, të zotët e tij u thanë atyre: “Përse po e zgjidhni kërriçin?.”

Luka 19:34 (ALB)
Dhe ata thanë: “Zoti ka nevojë.”

Luka 19:35 (ALB)
Dhe e prunë, pra, te Jezusi dhe, mbasi i hidhnin rrobat e veta mbi kërriçin, e hipën Jezusin mbi të.

Luka 19:36 (ALB)
Dhe, ndërsa ai ecte kështu përpara, ata shtronin rrobat e tyre në rrugë.

Luka 19:37 (ALB)
Dhe kur ai iu afrua teposhtës së malit të Ullinjve, gjithë turma e dishepujve filloi me gëzim të lavdërojë Perëndinë me zë të lartë për të gjitha veprat e pushtetshme që kishin parë,

Luka 19:38 (ALB)
duke thënë: “Bekuar qoftë Mbreti që po vjen në emër të Zotit; paqe në qiell dhe lavdi në vendet shumë të larta.”

Luka 19:39 (ALB)
Dhe disa farisenj që ishin midis turmës i thanë: “Mësues, qorto dishepujt e tu!.”

Luka 19:40 (ALB)
Dhe ai, duke u përgjigjur, u tha atyre: “Unë po ju them se në se këta do të heshtnin, gurët do të bërtisnin.”

Luka 19:41 (ALB)
Dhe kur ai po afrohej, e pa qytetin dhe qau mbi të,

Luka 19:42 (ALB)
duke thënë: “Oh, sikur ti, pikërisht ti, të njihje të paktën në ditën tënde ato që janë te nevojshme për paqen tënde! Por tashti ato janë të fshehura për sytë e tu.

Luka 19:43 (ALB)
Sepse përmbi ty do të vijnë ditë kur armiqtë e tu do të të qarkojnë me ledh, do të të rrethojnë dhe do të të zënë nga të gjitha anët.

Luka 19:44 (ALB)
Dhe do të të rrëzojnë përtokë ty dhe bijtë e tu në ty; dhe s’do të lënë në ty gur mbi gur, sepse ti nuk e ke njohur kohën kur je vizituar.”

Luka 19:45 (ALB)
Pastaj, mbasi hyri në tempull, filloi t’i dëbojë jashtë ata që shistin e blinin,

Luka 19:46 (ALB)
duke u thënë atyre: “Éshtë shkruar: "Shtëpia ime është shtëpi e lutjes, por ju e bëtë shpellë kusarësh".”

Luka 19:47 (ALB)
Çdo ditë ai mësonte në tempull. Dhe krerët e priftërinjve, skribët dhe krerët e popullit kërkonin ta vrisnin.

Luka 19:48 (ALB)
Dhe nuk arrinin dot të vendosnin çfarë të bënin; sepse gjithë populli e dëgjonte me vemendje të madhe.

Luka 19 ALB

Luka (ALB) Chapter Selection

ALB Book Selection List