Luka 21:1 (ALB)
Pastaj Jezusi i çoi sytë dhe pa pasanikët që qitnin dhuratat e tyre në arkën e thesarit,

Luka 21:2 (ALB)
dhe pa edhe një të ve të varfër që qiti dy pare të vogla

Luka 21:3 (ALB)
dhe tha: “Në të vërtetë po ju them se kjo e ve e varfër ka qitur më shumë se gjithë të tjerët.

Luka 21:4 (ALB)
Sepse të gjithë këta dhanë nga tepricat e pasurisë së tyre për shtëpinë e Perëndisë, kurse ajo, në varfërinë e vet, dha gjithçka që kishte për të jetuar.”

Luka 21:5 (ALB)
Pastaj, kur disa po flisnin për tempullin dhe vinin në pah se ishte i stolisur me gurë të bukur dhe me oferta, ai tha:

Luka 21:6 (ALB)
“Nga të gjitha këto gjëra që ju admironi, do të vijnë ditët kur nuk do të mbetet gur mbi gur pa u rrënuar.”

Luka 21:7 (ALB)
Atëherë ata e pyetën duke thënë: “Mësues, kur do të ndodhin këto dhe cila do të jetë shenja se këto janë duke u kryer?.”

Luka 21:8 (ALB)
Dhe ai tha: “Ruhuni se mos ju mashtrojnë, sepse shumë veta do të vijnë në emrin tim duke thënë: "Unë jam," dhe: "Erdhi koha". Mos shkoni, pra, pas tyre.

Luka 21:9 (ALB)
Dhe kur të dëgjoni të flitet për luftëra e për trazira, mos u trembni, sepse të gjitha këto duhet të ndodhin më parë, por mbarimi nuk do të vijë menjëherë.”

Luka 21:10 (ALB)
Atëherë u tha atyre: “Do të ngrihet kombi kundër kombit; dhe mbretëria kundër mbretërisë;

Luka 21:11 (ALB)
do të ngjajnë tërmete të mëdha, zi buke dhe murtaja në vende të ndryshme; do të ndodhin edhe dukuri të llahtarshme dhe shenja të mëdha nga qielli.

Luka 21:12 (ALB)
Por, para të gjitha këtyre gjërave, do të vënë dorë mbi ju dhe do t’ju përndjekin dhe do t’ju dorëzojnë në sinagoga e do t’ju futin në burg; dhe do t’ju nxjerrin përpara mbretërve dhe guvernatorëve për shkak të emrit tim,

Luka 21:13 (ALB)
por kjo do t’ju japë rastin që të dëshmoni.

Luka 21:14 (ALB)
Ta vini, pra, në zemrën tuaj që të mos mendoni më parë se si do përgjigjeni për t’u mbrojtur,

Luka 21:15 (ALB)
sepse unë do t’ju jap një gojë e një dituri të tillë të cilën të gjithë kundërshtarët tuaj nuk do të jenë në gjendje ta kundërshtojnë ose t’i rezistojnë.

Luka 21:16 (ALB)
Dhe ju madje do t’ju tradhtojnë edhe prindërit, dhe vëllezërit, dhe farefisi dhe miqtë; dhe disa prej jush do t’i vrasin.

Luka 21:17 (ALB)
Dhe të gjithë do t’ju urrejnë për shkak të emrit tim.

Luka 21:18 (ALB)
Por as edhe një fije floku e kokës suaj nuk do t’ju humbasë.

Luka 21:19 (ALB)
Me durimin tuaj ju do t’i fitoni shpirtrat tuaj.”

Luka 21:20 (ALB)
“Dhe kur do të shikoni Jeruzalemin të rrethuar nga ushtritë, ta dini se shkretimi i saj është afër.

Luka 21:21 (ALB)
Atëherë ata që janë në Jude, të ikin në male; dhe ata që janë në qytet të largohen; dhe ata që janë në fushë të mos hyjnë në të.

Luka 21:22 (ALB)
Sepse ato janë ditë të hakmarrjes, që të përmbushen të gjitha ato gjëra që janë shkruar.

Luka 21:23 (ALB)
Mjerë gratë shtatzëna dhe ato që mëndin në ato ditë, sepse do të ketë mjerim të madh në vend dhe mëri mbi këtë popull.

Luka 21:24 (ALB)
Dhe ata do të bien nga tehu i shpatës, do t’i çojnë robër ndër të gjitha kombet, dhe Jeruzalemin do ta shkelin paganët, derisa të plotësohen kohët e paganëve.”

Luka 21:25 (ALB)
“Dhe do të ketë shenja në diell, në hënë dhe në yje, dhe mbi tokë ankth popujsh, në përhumbjen prej gjëmës së detit dhe të valëve të tij;

Luka 21:26 (ALB)
njerëzit do të mpaken nga frika dhe nga pritja se çfare do ta pllakosë botën, sepse fuqitë qiellore do të lëkunden.

Luka 21:27 (ALB)
Atëherë do të shohin Birin e njeriut duke ardhur mbi një re, me fuqi dhe lavdi të madhe.

Luka 21:28 (ALB)
Dhe kur këto të fillojnë të ndodhin, shikoni lart dhe ngrini kokat tuaja, sepse çlirimi juaj është afër.”

Luka 21:29 (ALB)
Pastaj u tha atyre një shëmbëlltyrë: “Vini re fikun dhe të gjitha pemët.

Luka 21:30 (ALB)
Kur ata nisin e mugullojnë, duke i parë, ju vete e kuptoni se vera është afër;

Luka 21:31 (ALB)
kështu edhe ju, kur do të shikoni se po ndodhin këto, ta dini se mbretëria e Perëndisë është afër.

Luka 21:32 (ALB)
Në të vërtetë unë po ju them se nuk do të kalojë ky brez, derisa të gjitha këto gjëra të kenë ndodhur.

Luka 21:33 (ALB)
Qielli dhe toka do të kalojnë, por fjalët e mia nuk do të kalojnë.”

Luka 21:34 (ALB)
“Tani kini kujdes që zemrat tuaja të mos rëndohen nga të llupurit, nga të dehurit dhe nga preokupimet e kësaj jete; që ajo ditë të mos ju zërë në befasi.

Luka 21:35 (ALB)
Sepse do të vijë si një lak mbi të gjithë ata që banojnë mbi faqen e mbarë dheut.

Luka 21:36 (ALB)
Prandaj, rrini zgjuar dhe lutuni kurdoherë që të çmoheni të denjë të shpëtoni nga të gjitha ato që do të ngjasin dhe të dilni para Birit të njeriut.”

Luka 21:37 (ALB)
Gjatë ditës ai mësonte në tempull, dhe natën dilte dhe e kalonte jashtë, në malin e Ullinjve.

Luka 21:38 (ALB)
Dhe gjithë populli, herët në mëngjes, erdhi tek ai në tempull për ta dëgjuar.