Mateu 17:1 (ALB)
Mbas gjashtë ditësh Jezusi mori me vete Pjetrin, Jakobin dhe Gjonin, vëllanë e tij, dhe i çoi mbi një mal të lartë, në vetmi;

Mateu 17:2 (ALB)
dhe u shpërfytyrua përpara tyre: fytyra e tij shkëlqeu si dielli dhe rrobat e tij u bënë të bardha si drita.

Mateu 17:3 (ALB)
Dhe ja, iu shfaqën atyre Moisiu dhe Elia, të cilët bisedonin me të.

Mateu 17:4 (ALB)
Atëherë Pjetri, duke marrë fjalën, i tha Jezusit: “Zot, është mirë që ne jemi këtu; po të duash, do të ngremë këtu tri çadra: një për ty, një për Moisiun dhe një për Elian.”

Mateu 17:5 (ALB)
Ndërsa ai fliste akoma, ja një re plot dritë i mbuloi; dhe nga reja u dëgjua një zë që thoshte: “Ky është Biri im i dashur, në të jam kënaqur: dëgjojeni!.”

Mateu 17:6 (ALB)
Dhe dishepujt, sapo e dëgjuan këtë, ranë me fytyrë për tokë dhe i zuri një frikë e madhe.

Mateu 17:7 (ALB)
Por Jezusi u afrua, i preku dhe tha: “Çohuni dhe mos kini frikë!.”

Mateu 17:8 (ALB)
Dhe ata, kur i çuan sytë, nuk panë njeri, përveç Jezusit vetëm.

Mateu 17:9 (ALB)
Pastaj, kur po zbrisnin nga mali, Jezusi u dha atyre këtë urdhër duke thënë: “Mos i flisni askujt për këtë vegim, derisa i Biri i njeriut të jetë ringjallur prej së vdekuri.”

Mateu 17:10 (ALB)
Atëherë dishepujt e tij e pyetën duke thënë: “Vallë pse skribët thonë se duhet të vijë më parë Elia?.”

Mateu 17:11 (ALB)
Dhe Jezusi u përgjigj: “Vërtetë Elia duhet të vijë më parë dhe të rivendosë çdo gjë.

Mateu 17:12 (ALB)
Por unë ju them se Elia ka ardhur dhe ata nuk e kanë njohur, madje u sollën me të si deshën; kështu edhe Birit të njeriut do t’i duhet të vuajë prej tyre.”

Mateu 17:13 (ALB)
Atëherë dishepujt e kuptuan se u kishte folur për Gjon Pagëzorin.

Mateu 17:14 (ALB)
Kur arritën afër turmës, një burrë iu afrua dhe, duke u gjunjëzuar para tij,

Mateu 17:15 (ALB)
tha: “Zot, ki mëshirë për birin tim, sepse është epileptik dhe vuan shumë; shpesh ai bie në zjarr dhe shpesh në ujë.

Mateu 17:16 (ALB)
Tani unë e solla te dishepujt e tu, por ata nuk mundën ta shërojnë.”

Mateu 17:17 (ALB)
Dhe Jezusi duke u përgjigjur tha: “O brez që nuk beson dhe i çoroditur! Deri kur do të qëndroj midis jush? Deri kur do t’ju duroj? E sillni këtu tek unë.”

Mateu 17:18 (ALB)
Atëherë Jezusi e qortoi demonin dhe ky doli nga djali; dhe që nga ai çast djali u shërua.

Mateu 17:19 (ALB)
Atëherë dishepujt iu afruan Jezusit mënjanë dhe i thanë: “Përse ne nuk ishim në gjendje ta dëbonim?.”

Mateu 17:20 (ALB)
Dhe Jezusi u tha atyre: “Prej mosbesimit tuaj; sepse në të vërtetë, unë po ju them, se po të keni besim sa një kokërr sinapi, do t’i thoni këtij mali: "Zhvendosu nga këtu atje," dhe ai do të zhvendoset; dhe asgjë nuk do të jetë e pamundshme për ju.

Mateu 17:21 (ALB)
Por ky lloji demoni nuk del veçse me anë të lutjes dhe të agjërimit.”

Mateu 17:22 (ALB)
Por, ndërsa ata qëndronin në Galile, Jezusi u tha atyre: “Biri i njeriut do t’u dorëzohet në duart e njerëzve,

Mateu 17:23 (ALB)
dhe ata do ta vrasin; por ditën e tretë ai do të ringjallet.” Dhe ata u pikëlluan shumë.

Mateu 17:24 (ALB)
Kur arritën në Kapernaum, vjelësit e të drahmeve iu afruan Pjetrit dhe thanë: “Mësuesi juaj a e paguan taksën e tempullit?.”

Mateu 17:25 (ALB)
Ai tha: “Po.” Kur hyri në shtëpi, Jezusi e priti përpara duke thënë: “Ç’mendon ti, Simon? Prej kujt i marrin haraçet ose taksat mbretërit e dheut? Prej bijve të vet apo prej të huajve?.”

Mateu 17:26 (ALB)
Pjetri i tha: “Prej të huajve.” Jezusi tha: “Bijtë, pra, përjashtohen.

Mateu 17:27 (ALB)
Megjithatë, për të mos i skandalizuar ata, shko në det, hidhe grepin dhe merr peshkun e parë që do vijë lart, hapja gojën dhe do të gjesh një staterë; merre dhe jepjau atyre për ty dhe për mua.”