Mateu 14 | ALB Bible Study

Mateu 14:1 (ALB)
Në atë kohë Herodi, tetrarku, mori vesh famën e Jezusit,

Mateu 14:2 (ALB)
dhe u tha shërbëtorëve të vet: “Ky është Gjon Pagëzori; ai u ngjall së vdekuri dhe prandaj fuqitë e mbinatyrshme veprojnë në të.”

Mateu 14:3 (ALB)
Herodi, në fakt, e kishte arrestuar Gjonin, i kishte hedhur prangat dhe e kishte futur në burg, për shkak të Herodiadës, gruas së Filipit, vëllait të vet.

Mateu 14:4 (ALB)
Sepse Gjoni i thoshte: “Nuk është e lejueshme të bashkëjetosh me të!.”

Mateu 14:5 (ALB)
Dhe, ndonëse donte ta vriste, Herodi kishte frikë nga populli që e konsideronte Gjonin profet.

Mateu 14:6 (ALB)
Kur po festohej ditëlindja e Herodit, e bija e Herodiadës vallëzoi përpara tij dhe i pëlqeu Herodit

Mateu 14:7 (ALB)
aq shumë, sa ai i premtoi asaj me betim se do t’i jepte çfarëdo që t’i kërkonte.

Mateu 14:8 (ALB)
Dhe ajo, e shtyrë nga e ëma, tha: “Ma jep këtu, mbi një pjatë, kokën e Gjon Pagëzorit.”

Mateu 14:9 (ALB)
Mbretit i erdhi keq, po për shkak të betimit dhe të ftuarve që ishin me të në tryezë, urdhëroi që t’ia japin.

Mateu 14:10 (ALB)
Kështu dërgoi dikë për t’i prerë kokën Gjon Pagëzorit në burg;

Mateu 14:11 (ALB)
dhe kokën e tij e prunë mbi një pjatë dhe ia dhanë vajzës; ajo ia çoi s’ëmës.

Mateu 14:12 (ALB)
Pastaj erdhën dishepujt e tij, e morën trupin dhe e varrosën, mandej ata shkuan dhe ia treguan ngjarjen Jezusit.

Mateu 14:13 (ALB)
Kur Jezusi i dëgjoi këto, u nis që andej me një barkë dhe u tërhoq në vetmi, në një vend të shkretë. Dhe turmat, kur e morën vesh, e ndiqnin në këmbë nga qytetet.

Mateu 14:14 (ALB)
Dhe Jezusi, kur doli nga barka, pa një turmë të madhe, pati dhembshuri për të dhe shëroi ata që ishin të sëmurë.

Mateu 14:15 (ALB)
Pastaj në mbrëmje dishepujt e tij iu afruan dhe i thanë: “Ky vend është i shkretë dhe u bë vonë; lejo turmat të shkojnë nëpër fshatra për të blerë ushqime.”

Mateu 14:16 (ALB)
Por Jezusi u tha atyre: “Nuk është nevoja të shkojnë; u jepni juve të hanë.”

Mateu 14:17 (ALB)
Dhe ata i thanë: “Ne këtu nuk kemi tjetër përveç pesë bukë dhe dy peshq.”

Mateu 14:18 (ALB)
Dhe ai u tha: “M’i sillni këtu.”

Mateu 14:19 (ALB)
Atëherë i urdhëroi që turmat të ulen mbi bar; pastaj i mori pesë bukët dhe dy peshqit dhe, pasi i çoi sytë drejt qiellit, i bekoi; i ndau bukët dhe ua dha dishepujve, dhe dishepujt turmave.

Mateu 14:20 (ALB)
Dhe të gjithë hëngrën dhe u ngopën; pastaj dishepujt mblodhën tepricat në dymbëdhjetë kosha plot.

Mateu 14:21 (ALB)
Dhe ata që hëngrën ishin rreth pesë mijë burra, pa i numëruar gratë dhe fëmijët.

Mateu 14:22 (ALB)
Fill pas kësaj Jezusi i detyroi dishepujt e vet të hyjnë në barkë dhe t’i prijnë në bregun tjetër, deri sa ai t’i lëshojë turmat.

Mateu 14:23 (ALB)
Mbasi i nisi ato, u ngjit vetëm mbi mal për t’u lutur. Dhe kur u ngrys ai gjëndej aty, i vetëm fare.

Mateu 14:24 (ALB)
Ndërkaq barka ndodhej në mes të detit; dhe përplasej nga valët sepse era i ishte e kundërt.

Mateu 14:25 (ALB)
Në rojën e katërt të natës, Jezusi shkoi drejt tyre, duke ecur mbi det.

Mateu 14:26 (ALB)
Dishepujt duke parë atë që po ecte mbi det, u trembën dhe thanë: “Éshtë një fantazmë!.” Dhe filluan të bërtasin nga frika;

Mateu 14:27 (ALB)
por menjëherë Jezusi u foli atyre duke thënë: “Qetësohuni; jam unë, mos kini frikë!.”

Mateu 14:28 (ALB)
Dhe Pjetri, duke u përgjigjur tha: “Zot, nëse je ti, më urdhëro të vij te ti mbi ujëra.”

Mateu 14:29 (ALB)
Ai tha: “Eja!.” Dhe Pjetri zbriti nga barka dhe eci mbi ujëra, për të shkuar te Jezusi.

Mateu 14:30 (ALB)
Por, duke parë erën e fortë, kishte frikë, dhe duke filluar të fundosej, bërtiti duke thënë: “O Zot, shpëtomë!.”

Mateu 14:31 (ALB)
Dhe Jezusi ia zgjati menjëherë dorën, e zuri dhe i tha: “O njeri besimpak, pse dyshove?.”

Mateu 14:32 (ALB)
Pastaj, kur hynë në barkë, era pushoi.

Mateu 14:33 (ALB)
Atëherë ata që ishin në barkë erdhën dhe e adhuruan, duke thënë: “Me të vërtetë ti je Biri i Perëndisë!.”

Mateu 14:34 (ALB)
Pastaj, mbasi dolën në bregun tjetër, erdhën në krahinën e Gjenezaretit.

Mateu 14:35 (ALB)
Dhe njerëzit e atij vendi, sapo e njohën, e përhapën fjalën në gjithë krahinën përreth; dhe i sollën të gjithë të sëmurët;

Mateu 14:36 (ALB)
dhe iu lutën që të mund t’i preknin të paktën cepin e rrobes së tij; dhe të gjithë ata që e prekën u shëruan plotësisht.

Mateu 14 ALB

Mateu (ALB) Chapter Selection

ALB Book Selection List