Veprat e Apostujve 9:1 (ALB)
Ndërkaq Sauli, duke shfryrë akoma kërcënime dhe kërdi kundër dishepujve të Zotit, shkoi te kryeprifti,

Veprat e Apostujve 9:2 (ALB)
dhe kërkoi nga ai letra për sinagogat e Damaskut, me qëllim që, po të gjente ndonjë ithtar të Udhës, burra o gra, të mund t’i sillte të lidhur në Jeruzalem.

Veprat e Apostujve 9:3 (ALB)
Por ndodhi që, ndërsa po udhëtonte dhe po i afrohej Damaskut, befas rreth tij vetëtiu një dritë nga qielli.

Veprat e Apostujve 9:4 (ALB)
Dhe, si u rrëzua përtokë, dëgjoi një zë që i thoshte: “Saul, Saul, përse më përndjek?.”

Veprat e Apostujve 9:5 (ALB)
Dhe ai tha: “Kush je, Zot?.” Dhe Zoti tha: “Unë jam Jezusi, që ti e përndjek; është e rëndë për ty të godasësh me shkelm kundër gjembave.”

Veprat e Apostujve 9:6 (ALB)
Atëherë ai, duke u dridhur i tëri dhe i trembur, tha: “Zot, ç’don ti të bëj unë?.” Dhe Zoti: “Çohu dhe hyr në qytet, dhe do të të thuhet ç’duhet të bësh.”

Veprat e Apostujve 9:7 (ALB)
Dhe njerëzit që udhëtonin me të ndaluan të habitur, sepse dëgjonin tingullin e zërit, por nuk shikonin njeri.

Veprat e Apostujve 9:8 (ALB)
Pastaj Sauli u çua nga toka, por, kur i çeli sytë, nuk shihte asnjeri; atëherë e morën për dore dhe e çuan në Damask.

Veprat e Apostujve 9:9 (ALB)
Dhe mbeti tri ditë pa të parit, as hëngri as piu.

Veprat e Apostujve 9:10 (ALB)
Në Damask ishte një dishepull me emër Anania, të cilit Zoti i tha në vegim: “Anania!.” Dhe ai u përgjigj: “Ja ku jam, Zot!.”

Veprat e Apostujve 9:11 (ALB)
Dhe Zoti i tha: “Çohu dhe shko në rrugën e quajtur E drejtë, dhe kërko në shtëpinë e Judës një njeri nga Tarsi me emër Saul, i cili po lutet;

Veprat e Apostujve 9:12 (ALB)
ai ka parë në vegim një njeri, me emër Anania, duke hyrë dhe duke i vënë duart për t’ia kthyer dritën e syve.”

Veprat e Apostujve 9:13 (ALB)
Atëherë Anania u përgjigj: “O Zot, nga shumë veta kam dëgjuar për këtë njeri se sa të këqija u ka bërë shenjtorëve të tu në Jeruzalem.

Veprat e Apostujve 9:14 (ALB)
Dhe ai ka këtu një autorizim nga krerët e priftërinjve për të burgosur të gjithë ata që thërrasin emrin tënd.”

Veprat e Apostujve 9:15 (ALB)
Por Zoti i tha: “Shko, sepse ai është vegla që unë kam zgjedhur për ta sjellë emrin tim përpara johebrenjve, mbretërve dhe bijve të Izraelit.

Veprat e Apostujve 9:16 (ALB)
Sepse unë do t’i tregoj atij sa shumë i duhet të vuajë për emrin tim.”

Veprat e Apostujve 9:17 (ALB)
Atëherë Anania shkoi dhe hyri në atë shtëpi; dhe, duke i vënë duart, tha: “Vëlla Saul, Zoti Jezus, që të është shfaqur në rrugën nëpër të cilën ti po vije, më ka dërguar që të kesh përsëri dritën e syve dhe të mbushesh me Frymën e Shenjtë.”

Veprat e Apostujve 9:18 (ALB)
Në këtë çast i ranë nga sytë disa si luspa, dhe ai fitoi përsëri të parit; pastaj u ngrit dhe u pagëzua.

Veprat e Apostujve 9:19 (ALB)
Dhe, mbasi mori ushqim, ai u ripërtëri në forcë. Pastaj Sauli qëndroi disa ditë me dishepujt që ishin në Damask.

Veprat e Apostujve 9:20 (ALB)
Dhe filloi menjëherë të predikojë Krishtin në sinagoga se ai është Biri i Perëndisë.

Veprat e Apostujve 9:21 (ALB)
Dhe të gjithë ata që e dëgjonin çuditeshin dhe thoshnin: “Po a nuk është ky ai që në Jeruzalem përndiqte të gjithë ata që e thërrisnin këtë emër, dhe ka ardhur këtu me synim që t’i çojë si robër te krerët e priftërinjve?.”

Veprat e Apostujve 9:22 (ALB)
Por Sauli bëhej gjithnjë e më i fortë dhe i hutonte Judenjtë që banonin në Damask, duke ua vërtetuar se Jezusi është Krishti.

Veprat e Apostujve 9:23 (ALB)
Pas shumë ditësh, Judenjtë u konsultuan bashkë që ta vrasin.

Veprat e Apostujve 9:24 (ALB)
Por komploti i tyre u mor vesh nga Sauli. Dhe ditë e natë ata i ruanin portat e qytetit që të mund ta vrisnin;

Veprat e Apostujve 9:25 (ALB)
atëherë dishepujt e morën natën dhe e zbritën poshtë nga muri, në një shportë.

Veprat e Apostujve 9:26 (ALB)
Si arriti në Jeruzalem, Sauli u përpoq të bashkohej me dishepujt, por të gjithë kishin frikë nga ai, sepse nuk mund të besonin se ai ishte dishepull.

Veprat e Apostujve 9:27 (ALB)
Atëherë Barnaba e mori dhe e çoi tek apostujt, dhe u tregoi se si ai, gjatë udhëtimit, e kishte parë Zotin që i kishte folur, dhe si kishte folur në Damask lirshëm në emër të Jezusit.

Veprat e Apostujve 9:28 (ALB)
Kështu ai qëndroi me ta në Jeruzalem, dhe shkonte e vinte, dhe fliste lirshëm në emër të Zotit Jezus.

Veprat e Apostujve 9:29 (ALB)
Ai u fliste dhe diskutonte me helenistët, por ata kërkonin ta vrisnin.

Veprat e Apostujve 9:30 (ALB)
Por vëllezërit, kur e morën vesh, e çuan në Cezare dhe që andej e nisën për në Tars.

Veprat e Apostujve 9:31 (ALB)
Kështu në mbarë Judenë, në Galile dhe në Samari kishat kishin paqe dhe ndërtoheshin. Dhe duke ecur në druajtjen e Zotit dhe në ngushëllimin e Frymës së Shenjtë, shumoheshin.

Veprat e Apostujve 9:32 (ALB)
Por ndodhi që, ndërsa Pjetri po e përshkonte gjithë vendin, erdhi edhe te shenjtorët që banonin në Lida.

Veprat e Apostujve 9:33 (ALB)
Aty ai gjeti një njeri me emër Enea, i cili tashmë prej tetë vjetësh dergjej në shtrat, sepse ishte i paralizuar.

Veprat e Apostujve 9:34 (ALB)
Pjetri i tha: “Enea, Jezusi, Krishti, të shëron; çohu dhe ndreqe shtratin.” Dhe ai u ngrit menjëherë.

Veprat e Apostujve 9:35 (ALB)
Dhe të gjithë banorët e Lidës dhe të Saronit e panë dhe u kthyen te Zoti.

Veprat e Apostujve 9:36 (ALB)
Por në Jopë ishte një dishepull me emër Tabitha, që do të thotë Gazelë; ajo bënte shumë vepra të mira dhe jepte shumë lëmoshë.

Veprat e Apostujve 9:37 (ALB)
Por në ato ditë ndodhi që ajo u sëmur dhe vdiq. Pasi e lanë, e vunë në një dhomë në katin e sipërm.

Veprat e Apostujve 9:38 (ALB)
Dhe, duke qenë se Lida është afër Jopës, dishepujt, kur morën vesh se Pjetri ndodhej atje, i dërguan dy burra që ta lutnin të vijë tek ata pa vonesë.

Veprat e Apostujve 9:39 (ALB)
Atëherë Pjetri u ngrit dhe u nis bashkë me ta. Sapo arriti, e çuan në dhomën lart; të gjitha gratë e veja i dolën atij duke qarë dhe i treguan tunikat dhe veshjet që kishte punuar Gazela, sa ishte bashkë me to.

Veprat e Apostujve 9:40 (ALB)
Atëherë Pjetri, mbasi i nxori jashtë të gjithë, u ngjunjëzua dhe u lut. Pastaj iu kthye trupit dhe tha: “Tabitha, çohu!.” Dhe ajo i hapi sytë dhe, si pa Pjetrin, u ngrit ndenjur.

Veprat e Apostujve 9:41 (ALB)
Ai i dha dorën dhe e ndihmoi të ngrihet; dhe, si thirri shenjtorët dhe gratë e veja, ua tregoi të gjallë.

Veprat e Apostujve 9:42 (ALB)
Kjo u muar vesh në mbarë Jopën, dhe shumë veta besuan në Zotin.

Veprat e Apostujve 9:43 (ALB)
Dhe Pjetri qëndroi disa ditë në Jopë, në shtëpinë e njëfarë Simoni, regjës lëkurësh.