Veprat e Apostujve 8:1 (ALB)
Por Sauli e kishte miratuar vrasjen e tij. Në atë kohë u bë një përndjekje e madhe kundër kishës që ishte në Jeruzalem; dhe të gjithë u shpërndanë nëpër krahinat e Judesë dhe të Samarisë, me përjashtim të apostujve.

Veprat e Apostujve 8:2 (ALB)
Disa njerëz të përshpirtshëm e varrosën Stefanin dhe bënë gjëmë të madhe për të.

Veprat e Apostujve 8:3 (ALB)
Por Sauli po shkatërronte kishën: hynte shtëpi më shtëpi, merrte me vete burra dhe gra dhe i fuste në burg.

Veprat e Apostujve 8:4 (ALB)
Ata, pra, që ishin shpërndarë shkonin rreth e përqark, duke shpallur fjalën.

Veprat e Apostujve 8:5 (ALB)
Dhe Filipi zbriti në qytetin e Samarisë dhe u predikoi atyre Krishtin.

Veprat e Apostujve 8:6 (ALB)
Dhe turmat, me një mendje të vetme, dëgjonin me vëmendje gjërat që thoshte Filipi, duke dëgjuar dhe duke parë mrekullitë që ai bënte.

Veprat e Apostujve 8:7 (ALB)
Frymëra të ndyra, pra, dilnin nga shumë të idemonizuar, duke bërtitur me zë të lartë; dhe shumë të paralizuar e të çalë shëroheshin.

Veprat e Apostujve 8:8 (ALB)
Dhe në atë qytet u bë gëzim i madh.

Veprat e Apostujve 8:9 (ALB)
Prej kohësh në atë qytet ishte një njeri që quhej Simon, i cili merrej me magji dhe i bënte të çuditeshin njerëzit e Samarisë, gjoja sikur ishte njeri i madh.

Veprat e Apostujve 8:10 (ALB)
Dhe të gjithë, nga më i madhi te më i vogli, ia vinin veshin, duke thënë: “Ky është fuqia e madhe e Perëndisë.”

Veprat e Apostujve 8:11 (ALB)
Dhe e dëgjonin, sepse prej një kohe të gjatë ai i kishte mahnitur me mjeshtrinë e tij prej magjistari.

Veprat e Apostujve 8:12 (ALB)
Por, kur i besuan Filipit, që shpalli lajmin e mirë të gjërave të mbretërisë së Perëndisë dhe emrin e Jezu Krishtit, burra dhe gra u pagëzuan.

Veprat e Apostujve 8:13 (ALB)
Besoi edhe Simoni dhe, mbasi u pagëzua, rrinte vazhdimisht me Filipin; dhe, duke parë veprat e fuqishme dhe shenjat që ishin bërë, mbeti i çuditur.

Veprat e Apostujve 8:14 (ALB)
Por kur apostujt dëgjuan në Jeruzalem se Samaria kishte pranuar fjalën e Perëndisë, i dërguan atyre Pjetrin dhe Gjonin.

Veprat e Apostujve 8:15 (ALB)
Kur këta arritën, u lutën për ta, që të merrnin Frymën e Shenjtë,

Veprat e Apostujve 8:16 (ALB)
sepse ende nuk kishte zbritur mbi asnjë prej tyre, por ata vetëm ishin pagëzuar në emër të Zotit Jezus.

Veprat e Apostujve 8:17 (ALB)
Atëherë vunë duart mbi ta dhe ata morën Frymën e Shenjtë.

Veprat e Apostujve 8:18 (ALB)
Dhe Simoni, kur pa se me vënien e duarve të apostujve jepej Fryma e Shenjtë, u ofroi atyre para,

Veprat e Apostujve 8:19 (ALB)
duke thënë: “Ma jepni edhe mua këtë pushtet, që ai të cilit do t’i vë duart, të marrë Frymën e Shenjtë.”

Veprat e Apostujve 8:20 (ALB)
Por Pjetri i tha: “Le të humbasë paraja jote dhe ti bashkë me të, sepse ti mendove se mund ta blesh me para dhuratën e Perëndisë.

Veprat e Apostujve 8:21 (ALB)
Ti nuk ke as pjesë as short në këtë gjë, sepse zemra jote nuk është e drejtë përpara Perëndisë.

Veprat e Apostujve 8:22 (ALB)
Pendohu, pra, për këtë ligësi që ke dhe lutju Perëndisë që, po të jetë e mundur, të të falet mendimi i zemrës sate.

Veprat e Apostujve 8:23 (ALB)
Sepse unë të shoh se je në vrerin e hidhësisë dhe në prangat e paudhësisë.”

Veprat e Apostujve 8:24 (ALB)
Dhe Simoni, duke u përgjigjur, tha: “Lutjuni ju Zotit për mua, që të mos më ndodhë asgjë nga ato që thatë.”

Veprat e Apostujve 8:25 (ALB)
Ata, pra, pasi dhanë dëshmi dhe predikuan fjalën e Zotit, u kthyen në Jeruzalem, mbasi ungjillzuan shumë fshatra të Samaritanëve.

Veprat e Apostujve 8:26 (ALB)
Dhe një engjëll i Zotit i foli Filipit, duke i thënë: “Çohu dhe shko drejt jugut, në rrugën që nga Jeruzalemi zbret në Gaza; ajo është e shkretë.”

Veprat e Apostujve 8:27 (ALB)
Ai u ngrit dhe u nis; dhe ja, një njeri Etiopas, eunuk, një zyrtar i lartë i Kandaces, mbretëreshës së Etiopisë, përgjegjës i të gjitha thesareve të saj, i cili kishte ardhur në Jeruzalem për të adhuruar.

Veprat e Apostujve 8:28 (ALB)
Tani ai po kthehej dhe, i ulur në karrocën e vet, lexonte profetin Isaia.

Veprat e Apostujve 8:29 (ALB)
Dhe Fryma i tha Filipit: “Afrohu dhe arrije atë karrocë!.”

Veprat e Apostujve 8:30 (ALB)
Filipi iu turr afër dhe, duke dëgjuar se po lexonte profetin Isaia, i tha: “A e kupton atë që lexon?.”

Veprat e Apostujve 8:31 (ALB)
Ai tha: “E si do të mundja, po s’pata një që të më udhëzojë?.” Pastaj iu lut Filipit të hipë dhe të ulet pranë tij.

Veprat e Apostujve 8:32 (ALB)
Por pjesa e Shkrimit që ai po lexonte ishte kjo: “Atë e çuan si delja në thertore; dhe ashtu si qengji është memec përpara qethtarit, kështu ai nuk e hapi gojën e vet.

Veprat e Apostujve 8:33 (ALB)
Në përuljen e tij iu mohua çfarëdolloj drejtësie; po kush do të mund ta përshkruajë brezin e tij? Sepse jeta e tij u hoq nga toka.”

Veprat e Apostujve 8:34 (ALB)
Dhe eunuku iu kthye Filipit dhe tha: “Të lutem, për kë e thotë profeti këtë? Për veten e vet apo për ndonjë tjetër?.”

Veprat e Apostujve 8:35 (ALB)
Atëherë e mori fjalën Filipi dhe, duke filluar nga ky Shkrim, i shpalli Jezusin.

Veprat e Apostujve 8:36 (ALB)
Dhe, ndërsa po vazhdonin rrugën, arritën në një vend me ujë. Dhe eunuku tha: “Ja uji! Çfarë më pengon të pagëzohem?.”

Veprat e Apostujve 8:37 (ALB)
Dhe Filipi tha: “Nëse ti beson me gjithë zemër, mund ta bësh.” Dhe ai u përgjigj duke thënë: “Unë besoj se Jezu Krishti është Biri i Perëndisë.”

Veprat e Apostujve 8:38 (ALB)
Urdhëroi atëherë të ndalet karroca, dhe të dy, Filipi dhe eunuku, zbritën në ujë dhe ai e pagëzoi.

Veprat e Apostujve 8:39 (ALB)
Kur dolën nga uji, Fryma e Zotit e rrëmbeu Filipin dhe eunuku nuk e pa më; por e vazhdoi rrugën e tij me plot gëzim.

Veprat e Apostujve 8:40 (ALB)
Por Filipi u gjet në Azot; dhe, duke vazhduar, ungjillëzoi të gjitha qytetet, derisa arriti në Cezare.