Veprat e Apostujve 15:1 (ALB)
Dhe disa, që zbritën nga Judeja, mësonin vëllezërit: “Nëse nuk jeni rrethprerë sipas ritit të Moisiut, nuk mund të shpëtoheni.”

Veprat e Apostujve 15:2 (ALB)
Duke qenë se u bë një grindje jo e vogël dhe një diskutim nga ana e Palit dhe e Barnabës me ata, u dha urdhër që Pali, Barnaba dhe disa të tjerë nga ata të ngjiten në Jeruzalem tek apostujt dhe te pleqtë për këtë çështje.

Veprat e Apostujve 15:3 (ALB)
Ata, pra, si u përcollën nga kisha, kaluan nëpër Feniki dhe Samari, duke treguar kthimin e johebrenjve dhe duke u sjellë gëzim të madh mbarë vëllezërve.

Veprat e Apostujve 15:4 (ALB)
Kur arritën në Jeruzalem, u pritën nga kisha, nga apostujt dhe nga pleqtë dhe treguan për gjërat e mëdha që Perëndia kishte bërë me anën e tyre.

Veprat e Apostujve 15:5 (ALB)
Por u ngritën disa nga sekti i farisenjve, që kishin besuar dhe thanë: “Duhen rrethprerë johebrenjtë dhe të urdhërohen të zbatojnë ligjin e Moisiut.”

Veprat e Apostujve 15:6 (ALB)
Atëherë apostujt dhe pleqtë u mblodhën për ta shqyrtuar këtë problem.

Veprat e Apostujve 15:7 (ALB)
Dhe duke qenë se lindi një diskutim i madh, Pjetri u çua në këmbë dhe u tha atyre: “Vëllezër, ju e dini se që në kohët e para Perëndia midis nesh më zgjodhi mua, që me anë të gojës sime johebrenjtë të dëgjojnë fjalën e ungjillit dhe të besojnë.

Veprat e Apostujve 15:8 (ALB)
Perëndia, që i njeh zemrat, u ka dhënë atyre dëshmi, duke u dhënë Frymën e Shenjtë, sikurse edhe neve;

Veprat e Apostujve 15:9 (ALB)
dhe ai nuk bëri asnjë dallim midis nesh dhe atyre, duke i pastruar zemrat e tyre me anë të besimit.

Veprat e Apostujve 15:10 (ALB)
Tani, pra, pse e tundoni Perëndinë, duke u vënë mbi qafën e dishepujve një zgjedhë që as etërit tanë e as ne nuk mund ta mbajmë?

Veprat e Apostujve 15:11 (ALB)
Po ne besojmë se do të shpëtohemi me anë të hirit të Zotit Jezu Krishtit, dhe në të njëjtën mënyrë edhe ata.”

Veprat e Apostujve 15:12 (ALB)
Atëherë e gjithë turma heshti, dhe rrinte e dëgjonte Barnabën dhe Palin, që tregonin ç’shenja e mrekulli kishte bërë Perëndia me anë të tyre ndër johebrenj.

Veprat e Apostujve 15:13 (ALB)
Dhe si heshtën ata, Jakobi e mori fjalën dhe tha: “Vëllezër, më dëgjoni!

Veprat e Apostujve 15:14 (ALB)
Simoni ka treguar si i ka vizituar për herë të parë Perëndia johebrenjtë, që të zgjedhë nga ata një popull për emrin e tij.

Veprat e Apostujve 15:15 (ALB)
Me këtë gjë pajtohen fjalët e profetëve, sikundër është shkruar:

Veprat e Apostujve 15:16 (ALB)
"Pas këtyre gjerave, unë do të kthehem dhe do ta rindërtoj tabernakullin e Davidit që është rrëzuar, do t’i restauroj gërmadhat e tij dhe do ta ngre përsëri më këmbë,

Veprat e Apostujve 15:17 (ALB)
që mbetja e njerëzve dhe të gjitha johebrenjtë mbi të cilat thirret emri im, të kërkojnë Zotin, thotë Zoti që i bën të gjitha këto".

Veprat e Apostujve 15:18 (ALB)
Prej kohësh janë të njohura te Perëndia të gjitha veprat e tij.

Veprat e Apostujve 15:19 (ALB)
Prandaj unë gjykoj që të mos i bezdisim ata nga johebrenjtë që kthehen te Perëndia,

Veprat e Apostujve 15:20 (ALB)
por t’u shkruhet atyre që të heqin dorë nga ndotjet e idhujve, nga kurvëria, nga gjërat e mbytura dhe nga gjaku.

Veprat e Apostujve 15:21 (ALB)
Sepse Moisiu që nga kohët e lashta ka njerëz të cilët në çdo qytet e predikojnë atë, duke qënë i lexuar çdo të shtunë në sinagoga.”

Veprat e Apostujve 15:22 (ALB)
Atëherë iu duk e mirë apostujve dhe pleqve me gjithë kishën të dërgojnë në Antioki, me Palin dhe Barnabën, disa njerëz të zgjedhur nga ata: Judën, mbiquajtur Barsaba, dhe Silën, njerëz me autoritet ndër vëllezërit,

Veprat e Apostujve 15:23 (ALB)
me një letër të shkruar nga dora e tyre që thoshte: “Apostujt, pleqtë dhe vëllezërit, vëllezërve nga johebrenjtë që janë në Antioki, Siri dhe Kiliki, përshëndetje.

Veprat e Apostujve 15:24 (ALB)
Duke qenë se morëm vesh se disa që erdhën prej nesh, por të cilëve ne nuk u kishim dhënë asnjë porosi, ju kanë shqetësuar me fjalë duke trazuar shpirtrat tuaj, duke thënë se ju duhet të rrethpriteni dhe të zbatoni ligjin,

Veprat e Apostujve 15:25 (ALB)
na u duk e mirë neve, të mbledhur tok me një zemër, të zgjedhim disa njerëz dhe t’i dërgojmë bashkë me të dashurit tanë Barnaba dhe Pal,

Veprat e Apostujve 15:26 (ALB)
njerëz që kanë përkushtuar jetën e tyre për emrin e Zotit tonë Jezu Krishtit.

Veprat e Apostujve 15:27 (ALB)
Kemi dërguar, pra, Judën dhe Silën; edhe ata do t’ju tregojnë me gojë të njëjtat gjëra.

Veprat e Apostujve 15:28 (ALB)
Në fakt na u duk mirë Frymës së Shenjtë dhe neve që të mos ju ngarkojmë asnjë barrë tjetër përveç këtyre gjërave të nevojshme:

Veprat e Apostujve 15:29 (ALB)
që ju të hiqni dorë nga gjërat e flijiuara idhujve, nga gjaku, nga gjërat e mbytura dhe nga kurvëria; do të bëni mirë të ruheni nga këto. Qofshi mirë.”

Veprat e Apostujve 15:30 (ALB)
Ata, pra, mbasi u ndanë, zbritën në Antiokia dhe, si mblodhën kuvendin, e dorëzuan letrën.

Veprat e Apostujve 15:31 (ALB)
Dhe ata, mbasi e lexuan, u gëzuan për ngushëllimin.

Veprat e Apostujve 15:32 (ALB)
Dhe Juda e Sila, që ishin edhe ata profetë, me shumë fjalë i nxitën vëllezërit dhe i forcuan.

Veprat e Apostujve 15:33 (ALB)
Mbasi ndenjën atje ca kohë, u dërguan prapë me paqtim nga vëllezërit tek apostujt.

Veprat e Apostujve 15:34 (ALB)
Por Silës iu duk mirë të mbetej aty.

Veprat e Apostujve 15:35 (ALB)
Edhe Pali e Barnaba qëndruan në Antioki, duke mësuar dhe duke shpallur me shumë të tjerë fjalën e Zotit.

Veprat e Apostujve 15:36 (ALB)
Pas disa ditësh Pali i tha Barnabës: “Le të kthehemi të shohim vëllezërit tanë në çdo qytet, ku kemi shpallur fjalën e Perëndisë, për të parë si janë.”

Veprat e Apostujve 15:37 (ALB)
Dhe Barnaba donte të merrte me vete Gjonin, të quajtur Mark.

Veprat e Apostujve 15:38 (ALB)
Por Pali mendonte se nuk duhej marrë me vete atë që ishte ndarë prej tyre në Pamfili, dhe nuk kishte shkuar me ata në punë.

Veprat e Apostujve 15:39 (ALB)
Atëherë lindi një grindje saqë ata u ndanë njëri nga tjetri; pastaj Barnaba, mbasi mori Markun, lundroi për në Qipro.

Veprat e Apostujve 15:40 (ALB)
Por Pali zgjodhi Silën dhe u nis, pasi vëllezërit e lanë në hir të Perëndisë.

Veprat e Apostujve 15:41 (ALB)
Dhe përshkoi Sirinë dhe Kilikinë, duke i forcuar kishat.