Hebrenjve 10:1 (ALB)
Sepse ligji, duke pasur hijen e të mirave që kishin për të ardhur dhe jo figurën vetë të gjërave, nuk mundet kurrë që t’i bëjë të përkryer ata që i afrohen Perëndisë me anë të të njëjtave flijime që ofrohen vazhdimisht vit për vit.

Hebrenjve 10:2 (ALB)
Sepse përndryshe do të kishin pushuar t’i ofronin, sepse ata që e ushtrojnë kultin, si të pastroheshin një herë, a nuk do të kishin më asnjë vetëdije për mëkatet?

Hebrenjve 10:3 (ALB)
Por në këto flijime përtërihet çdo vit kujtimi i mëkateve,

Hebrenjve 10:4 (ALB)
sepse është e pamundur që gjaku i demave dhe i cjepve të heqë mëkatët.

Hebrenjve 10:5 (ALB)
Prandaj, duke hyrë në botë, ai thotë: “Ti nuk deshe as flijim as mblatë, po bëre gati për mua një trup;

Hebrenjve 10:6 (ALB)
ti nuk pëlqeve as olokauste as flijimet për mëkatin.

Hebrenjve 10:7 (ALB)
Atëherë unë thashë: "Ja, unë po vij; në rotullin e librit është shkruar për mua; për të bërë, o Perëndi, vullnetin tënd".”

Hebrenjve 10:8 (ALB)
Mbasi tha: “Ti nuk deshe as flijim as mblatë, as olokauste as flijime për mëkatin, që të blatohen sipas ligjit,”

Hebrenjve 10:9 (ALB)
ai shtoi: “Ja, unë vij për të bërë, o Perëndi, vullnetin tënd.” Ai heq të parën, që të vërë të dytën.

Hebrenjve 10:10 (ALB)
Prej këtij vullneti, ne jemi shenjtëruar me anë të kushtimit të trupit të Jezu Krishtit, që u bë një herë për të gjithë.

Hebrenjve 10:11 (ALB)
Dhe ndërsa çdo prift rri përdita në këmbë duke shërbyer dhe duke mblatuar shpesh herë të njëjtat flijime, që nuk mund të heqin kurrë mëkatet,

Hebrenjve 10:12 (ALB)
ai, përkundrazi, pasi dha për gjithnjë një flijim të vetëm për mëkatet, u vu të rrijë në të djathtën e Perëndisë,

Hebrenjve 10:13 (ALB)
duke pritur paskëtaj vetëm që armiqtë e tij t’i vihen si ndenjëse për këmbët e tij.

Hebrenjve 10:14 (ALB)
Sepse, me një ofertë të vetme, ai i bëri të përsosur për gjithnjë ata që shenjtërohen.

Hebrenjve 10:15 (ALB)
Por edhe Fryma e Shenjtë na e dëshmon; sepse, mbasi pat thënë më parë:

Hebrenjve 10:16 (ALB)
“Kjo është Besëlidhja që unë do të bëj me ata pas atyre ditëve, thotë Perëndia, unë do t’i shtie ligjet e mia në zemrat e tyre dhe do t’i shkruaj në mendjet e tyre,”

Hebrenjve 10:17 (ALB)
shton: “Dhe nuk do t’i kujtoj më mëkatet e tyre dhe paudhësitë e tyre.”

Hebrenjve 10:18 (ALB)
Edhe atje ku ka ndjesë të këtyre gjërave, nuk ka më ofertë për mëkatin.

Hebrenjve 10:19 (ALB)
Duke pasur, pra, o vëllezër, liri të plotë për të hyrë në shenjtërore me anë të gjakut të Jezusit,

Hebrenjve 10:20 (ALB)
me anë të një udhe të re dhe të gjallë që ai përuroi për ne me anë të velit, domethënë të mishit të tij,

Hebrenjve 10:21 (ALB)
edhe duke pasur një kryeprift mbi shtëpinë e Perëndisë,

Hebrenjve 10:22 (ALB)
le t’i afrohemi me zemër të vërtetë, me siguri të plotë besimi, duke i pasur zemrat tona të lara prej ndërgjegjës së ligë dhe trupin të larë me ujë të kulluar.

Hebrenjve 10:23 (ALB)
Le të mbajmë të patundur rrëfimin e shpresës sonë, sepse besnik është ai që premtoi.

Hebrenjve 10:24 (ALB)
Dhe le të kujdesemi për njeri tjetrin, për t’u nxitur për dashuri dhe vepra të mira,

Hebrenjve 10:25 (ALB)
pa hequr dorë nga të mbledhurit bashkë tonin, sikurse kanë zakon disa, por të nxisim njeri tjetrin, aq më tepër se e shihni ditën që po afrohet.

Hebrenjve 10:26 (ALB)
Sepse, në qoftë se ne mëkatojmë me dashje mbasi kemi marrë dijeni të së vërtetës, nuk mbetet më asnjë flijim për mëkatet,

Hebrenjve 10:27 (ALB)
por vetëm një pritje gjyqi e tmerrshme dhe një e ndezur zjarri që do të përpijë kundërshtarët.

Hebrenjve 10:28 (ALB)
Kushdo që shkel ligjin e Moisiut vritet pa mëshirë me deponimet e dy ose tre dëshmitarëve.

Hebrenjve 10:29 (ALB)
Ç’dënim më të keq meriton, sipas mendimit tuaj, ai që ka shkelur me këmbë Birin e Perëndisë dhe e ka konsideruar profan gjakun e Besëlidhjes me të cilin u shenjtërua, dhe ka fyer Frymën e hirit?

Hebrenjve 10:30 (ALB)
Sepse ne e dimë atë që ka thënë: “Hakmarrja më takon mua, unë do ta jap shpagimin,” thotë Perëndia. Dhe përsëri: “Perëndia do të gjykojë popullin e vet.”

Hebrenjve 10:31 (ALB)
Gjë e tmerrshme është të bjerë njeriu në duart e Perëndisë së gjallë.

Hebrenjve 10:32 (ALB)
Dhe tani sillni ndërmend ditët e mëparshme, në të cilat, pasi u ndriçuat, keni duruar një luftë të madhe vuajtjesh,

Hebrenjve 10:33 (ALB)
herë duke u bërë objekt fyerjesh dhe mundimesh, herë duke u solidarizuar me ata që trajtoheshin në këtë mënyrë.

Hebrenjve 10:34 (ALB)
Sepse treguat dhembje për mua në prangat e mia dhe keni pranuar me gëzim t’ju zhveshin nga pasuria juaj, duke ditur se keni për veten tuaj një pasuri më të mirë e të qëndrueshme në qiej.

Hebrenjve 10:35 (ALB)
Mos e hidhni tej guximin tuaj, që do të ketë një shpërblim të madh.

Hebrenjve 10:36 (ALB)
Sepse ju keni nevojë për ngulm që mbasi, të bëni vullnetin e Perëndisë, të merrni gjërat e premtuara.

Hebrenjve 10:37 (ALB)
“Edhe fort pak kohë, edhe ai që duhet të vijë do të vijë dhe nuk do të vonojë.

Hebrenjve 10:38 (ALB)
Dhe i drejti do të jetojë prej besimit; por ne qoftë se ndokush tërhiqet prapa, shpirti im nuk do të gjejë pëlqim në të.”

Hebrenjve 10:39 (ALB)
Por ne nuk jemi nga ata që tërhiqen prapa për humbje, por nga ata që besojnë në shpëtimin e shpirtit.