2 Korintasve 3:1 (ALB)
A fillojmë përsëri të rekomandojmë veten tonë? Apo mos kemi nevojë, si disa, për letra rekomandimi për ju ose për rekomandime nga ana juaj?

2 Korintasve 3:2 (ALB)
Ju jeni letra jonë, e shkruar në zemrat tona, e njohur dhe e lexuar nga të gjithë njerëzit,

2 Korintasve 3:3 (ALB)
duke qenë manifestuar se jeni një letër e Krishtit, e hartuar me anë të shërbesës sonë, dhe e shkruar jo me bojë, por me Frymën e Perëndisë së gjallë, dhe jo mbi rrasa guri, por mbi rrasa të një zemre mishi.

2 Korintasve 3:4 (ALB)
Dhe këtë besim ne e kemi në Perëndinë me anë të Krishtit;

2 Korintasve 3:5 (ALB)
jo se jemi të aftë prej vetiu të kuptojmë ndonjë gjë sikur vjen nga vetja jonë, por aftësia jonë vjen nga Perëndia,

2 Korintasve 3:6 (ALB)
i cili na bëri të aftë të jemi shërbëtorë të besëlidhjes së re, jo të shkronjës, por të Frymës, sepse shkronja vret, por Fryma jep jetë.

2 Korintasve 3:7 (ALB)
Dhe, në qoftë se shërbimi i vdekjes, që ishte gdhendur me shkronja mbi gurë, qe i lavdishëm aq sa bijtë e Izraelit nuk mund të vështronin me sy fytyrën e Moisiut, për shkak të lavdisë së pamjes së tij, që duhet të anullohej,

2 Korintasve 3:8 (ALB)
sa më i lavdishëm do të jetë shërbimi i Frymës?

2 Korintasve 3:9 (ALB)
Sepse, nëse shërbimi i dënimit qe rrethuar me lavdi, shumë më tepër do të teprojë në lavdi shërbimi i drejtësisë.

2 Korintasve 3:10 (ALB)
Sepse ç’ka është lavdëruar nuk është lavdëruar nga kjo pikëpamje, për shkak të asaj lavdie që e kapërcen çdo masë.

2 Korintasve 3:11 (ALB)
Sepse, në qoftë se ajo që duhet të anullohej u rrethua me lavdi, ajo që mbetet do të jetë shumë më e lavdishme.

2 Korintasve 3:12 (ALB)
Duke pasur, pra, një shpresë të tillë, flasim me shumë guxim,

2 Korintasve 3:13 (ALB)
dhe jo si Moisiu, i cili vinte një vel mbi fytyrën e vet, që bijtë e Izraelit të mos vështronin me sy fundin e asaj që duhej të anullohej.

2 Korintasve 3:14 (ALB)
Por mendjet e tyre u errën; sepse, në leximin e besëlidhjes së vjetër, po ky vel mbetet pa u hequr, sepse veli anullohet në Krishtin.

2 Korintasve 3:15 (ALB)
Por deri më sot, kur lexohet Moisiu, një vel mbetet mbi zemrat e tyre.

2 Korintasve 3:16 (ALB)
Por kur Izraeli të kthehet te Zoti, veli do të hiqet.

2 Korintasve 3:17 (ALB)
Sepse Zoti është Fryma, dhe atje ku është Fryma e Zotit, atje është liria.

2 Korintasve 3:18 (ALB)
Dhe ne të gjithë, duke soditur fytyrëzbuluar lavdinë e Zotit si në pasqyrë, transformohemi në të njëjtën shëmbëllim nga lavdia në lavdi, posi prej Frymës së Zotit.