2 Korintasve 11:1 (ALB)
Oh, sa do të dëshiroja që ju të duronit pak marrëzi me mua! Po në fakt, ju më duroni.

2 Korintasve 11:2 (ALB)
Jam xheloz për ju me xhelozinë e Perëndisë, sepse ju fejova me një burrë, që t’ju nxjerr para Krishtit si virgjëreshë të dlirë.

2 Korintasve 11:3 (ALB)
Por druaj se, ashtu si gjarpëri e gënjeu Evën me dinakërinë e tij, kështu edhe mendja juaj të mos prishet duke u shmangur nga thjeshtësia ndaj Krishtit.

2 Korintasve 11:4 (ALB)
Sepse, po të vinte dikush dhe t’ju predikonte një Jezus tjetër, që ne nuk e kemi predikuar, ose, po të merrnit një frymë tjetër që nuk e keni marrë, ose një ungjill tjetër që nuk e keni pranuar, do ta duronit fort mirë.

2 Korintasve 11:5 (ALB)
Unë mendoj se nuk kam qenë aspak më poshtë nga apostujt më të shquar.

2 Korintasve 11:6 (ALB)
Dhe, megjithëse jam i thjeshtë në të folur, nuk jam i tillë në dituri; madje me të gjitha mënyrat dhe në të gjitha gjërat jua kemi treguar.

2 Korintasve 11:7 (ALB)
Mos vallë bëra mëkat duke e ulur veten time që të lartoheni ju, sepse ju kam predikuar falas ungjillin e Perëndisë?

2 Korintasve 11:8 (ALB)
Unë shfyrtësova kishat e tjera, duke marrë një rrogë që t’ju shërbej juve.

2 Korintasve 11:9 (ALB)
Dhe, kur isha midis jush dhe isha nevojtar, nuk iu bëra barrë askujt; sepse nevojat e mia i plotësuan vëllezërit që erdhën nga Maqedonia; dhe në çdo gjë u ruajta që të mos ju bëhem barrë ju, edhe për të ardhmen do të ruhem.

2 Korintasve 11:10 (ALB)
Duke qenë se e vërteta e Krishtit është në mua, kjo mburrje, përsa më përket mua, nuk do të më ndalohet në vendet e Akaisë.

2 Korintasve 11:11 (ALB)
Pse? Ndoshta sepse nuk ju dua? Perëndia e di.

2 Korintasve 11:12 (ALB)
Por atë që bëj, do ta bëj përsëri, që t’u pres çdo shkas atyre që duan shkas, që ata të gjenden si edhe ne, në atë gjë, për të cilën mburren.

2 Korintasve 11:13 (ALB)
Të tillë apostuj të rremë, janë punëtorë hileqarë, që shndërrohen në apostuj të Krishtit.

2 Korintasve 11:14 (ALB)
Dhe nuk është për t’u çuditur, sepse Satanai vet shndërrohet në engjëll drite.

2 Korintasve 11:15 (ALB)
Nuk është, pra, gjë e madhe, nëse edhe punëtorët e tij shndërrohen në punëtorë (marrin trajtën e punëtorëve) të drejtësisë, fundi i të cilëve do të jetë sipas veprave të tyre.

2 Korintasve 11:16 (ALB)
Po e them përsëri: Askush të mos mendojë se jam i marrë; në mos, më pranoni edhe si të marrë, që edhe unë të mburrem pakëz.

2 Korintasve 11:17 (ALB)
Atë që po them në mburrjen e guximit tim, nuk po e them sipas Zotit, por në marrëzi.

2 Korintasve 11:18 (ALB)
Duke qenë se shumë vetë mburren sipas mishit, edhe unë do të mburrem.

2 Korintasve 11:19 (ALB)
Sepse ju që jeni të ditur, i duroni lehtë të marrët.

2 Korintasve 11:20 (ALB)
Sepse tashmë ju duroni, nëse dikush ju robëron, nëse dikush ju gllabëron, nëse dikush ju grabit, nëse dikush krenohet, nëse dikush ju godet në fytyrë.

2 Korintasve 11:21 (ALB)
Flas për turpin tim, sikurse ne të ishim të dobët; megjithatë në çdo gjë që dikush guxon, po flas si i marrë, marr guxim edhe unë.

2 Korintasve 11:22 (ALB)
Janë ata Hebrenj? Jam edhe unë! Janë ata Izraelitë? Jam edhe unë! janë ata pasardhës të Abrahamit? Jam edhe unë.

2 Korintasve 11:23 (ALB)
Janë ata shërbëtorë të Krishtit? Po flas si i pamend, unë jam edhe më tepër si këta; në mundime më tepër, në goditje më tepër, në burgje më tepër dhe shpesh në rrezik për vdekje.

2 Korintasve 11:24 (ALB)
Nga Judenjtë mora pesë herë nga dyzetë kamxhike pa një.

2 Korintasve 11:25 (ALB)
Tri herë më rrahën me shkopinj, një herë më qëlluan me gurë, tri herë m’u mbyt anija në det, kalova një ditë e një natë në humnerë.

2 Korintasve 11:26 (ALB)
Në udhëtime të shpeshta në rreziqe lumenjsh, në rreziqe kusarësh, në rrezik nga ana e bashkëtdhetarëve, rreziqe nga ana johebrenjve, rreziqe në qytet, rreziqe në shkretëtirë, rreziqe në det, rreziqe midis vëllezërve të rremë,

2 Korintasve 11:27 (ALB)
në lodhje e në mundim, në netët pa gjumë, në uri e në etje, shpesh herë në agjërime, në të ftohtë dhe në të zhveshur.

2 Korintasve 11:28 (ALB)
Përveç këtyre gjërave të jashtme, ajo që më mundon çdo ditë është kujdesja për të gjitha kishat.

2 Korintasve 11:29 (ALB)
Kush është i dobët, që të mos jem edhe unë? Kush është skandalizuar dhe unë të mos përvëlohem?

2 Korintasve 11:30 (ALB)
Në qoftë se duhet të mburrem, unë do të mburrem me ato që kanë të bëjnë me dobësinë time.

2 Korintasve 11:31 (ALB)
Perëndia dhe Ati i Zotit tonë Jezu Krisht, që është i bekuar përjetë, e di se unë nuk gënjej.

2 Korintasve 11:32 (ALB)
Në Damask, qeveritari i mbretit Areta e ruante qytetin e Damaskasve për të më zënë,

2 Korintasve 11:33 (ALB)
por nga një dritare më ulën përgjatë murit me një shportë, dhe shpëtova nga duart e tij.