Romakëve 3:1 (ALB)
Cila është, pra, përparësia e Judeut, ose cila është dobia e rrethprerjes?

Romakëve 3:2 (ALB)
E madhe në çdo mënyrë; para së gjithash sepse orakujt e Perëndisë iu besuan atyre.

Romakëve 3:3 (ALB)
Ç’të thuash atëherë? Në qoftë se disa nuk besuan, mosbesimi i tyre do ta anulojë, vallë, besnikërinë e Perëndisë?

Romakëve 3:4 (ALB)
Kurrë mos qoftë; përkundrazi, qoftë Perëndia i vërtetë dhe çdo njeri gënjeshtar, siç është shkruar: “Që ti të shfajësohesh në fjalët e tua dhe të ngadhënjesh kur të gjykohesh.”

Romakëve 3:5 (ALB)
Po në qoftë se padrejtësia jonë e vë në pah drejtësinë e Perëndisë, ç’do të themi? Perëndia qënka i padrejtë kur shfren zemërimin e tij? (Unë flas si njeri).

Romakëve 3:6 (ALB)
Kurrë mos qoftë! Sepse atëherë, si do ta gjykonte Zoti botën?

Romakëve 3:7 (ALB)
Prandaj në qoftë se me anë të gënjeshtrës sime e vërteta e Perëndisë e lartëson lavdinë e tij, përse unë gjykohem akoma si mëkatar?

Romakëve 3:8 (ALB)
E përse të mos themi si disa që, duke shpifur, pohojnë se ne themi: “Të bëjmë të keqen që të vijë e mira”? Dënimi i këtyre është i drejtë.

Romakëve 3:9 (ALB)
E çfarë pra? A kemi ne ndonjë epërsi? Aspak! E kemi treguar në fakt që më përpara se si Judenjtë ashtu edhe Grekët janë të gjithë nën mëkat,

Romakëve 3:10 (ALB)
siç është shkruar: “Nuk ka asnjeri të drejtë, as edhe një.

Romakëve 3:11 (ALB)
Nuk ka asnjeri që të kuptojë, nuk ka asnjeri që të kërkojë Perëndinë.

Romakëve 3:12 (ALB)
Të gjithë kanë dalë nga udha e tij, që të gjithë janë bërë të padobishëm, nuk ka asnjë që të bëjë të mirën, as edhe një.

Romakëve 3:13 (ALB)
Gryka e tyre është një varr i hapur, me gjuhët e tyre kanë thurur mashtrime, ka helm gjarpërinjsh nën buzët e tyre;

Romakëve 3:14 (ALB)
goja e tyre është plot mallkim dhe hidhësi;

Romakëve 3:15 (ALB)
këmbët e tyre janë të shpejta për të derdhur gjak;

Romakëve 3:16 (ALB)
në udhët e tyre ka rrënim dhe gjëmë,

Romakëve 3:17 (ALB)
dhe nuk e kanë njohur udhën e paqes;

Romakëve 3:18 (ALB)
nuk ka druajtja e Perëndisë para syve të tyre.”

Romakëve 3:19 (ALB)
Por ne e dimë se gjithçka që thotë ligji, e thotë për ata që janë nën ligj, me qëllim që çdo gojë të heshtë dhe gjithë bota t’i jetë nënshtruar gjykimit të Perëndisë,

Romakëve 3:20 (ALB)
sepse asnjë mish nuk do të shfajësohet para tij për veprat e ligjit; me anë të ligjit në fakt arrihet njohja e mëkatit.

Romakëve 3:21 (ALB)
Por tani, pavarësisht nga ligji, është manifestuar drejtësia e Perëndisë, për të cilën dëshmojnë ligji dhe profetët,

Romakëve 3:22 (ALB)
madje drejtësia e Perëndisë nëpërmjet besimit në Jezu Krishtin për të gjithë e mbi të gjithë ata që besojnë, sepse nuk ka dallim;

Romakëve 3:23 (ALB)
sepse të gjithë mëkatuan dhe u privuan nga lavdia e Perëndisë,

Romakëve 3:24 (ALB)
por janë shfajësuar falas me anë të hirit të tij, nëpërmjet shpengimit që është në Krishtin Jezus.

Romakëve 3:25 (ALB)
Atë ka paracaktuar Perëndia për të bërë shlyerjen nëpërmjet besimit në gjakun e tij, për të treguar kështu drejtësinë e tij për faljen e mëkateve, që janë kryer më parë gjatë kohës së durimit të Perëndisë,

Romakëve 3:26 (ALB)
për të treguar drejtësinë e tij në kohën e tanishme, me qëllim që ai të jetë i drejtë dhe shfajësues i atij që ka besimin e Jezusit.

Romakëve 3:27 (ALB)
Ku është, pra, mburrja? Éshtë përjashtuar. Nga cili ligj? Ai i veprave? Jo, por nga ligji i besimit.

Romakëve 3:28 (ALB)
Ne, pra, konkludojmë se njeriu është i shfajësuar nëpërmjet besimit pa veprat e ligjit.

Romakëve 3:29 (ALB)
A është vallë Perëndia vetëm Perëndia i Judenjve? A nuk është edhe i johebrenjve? Sigurisht, është edhe Perëndia i johebrenjve.

Romakëve 3:30 (ALB)
Sepse ka vetëm një Perëndi, që do të shfajësojë të rrethprerin nëpërmjet besimit, dhe të parrethprerin me anë të besimit.

Romakëve 3:31 (ALB)
Anulojmë ne, pra, ligjin nëpërmjet besimit? Kështu mos qoftë; përkundrazi e forcojmë ligjin.