Romakëve 12:1 (ALB)
O vëllezër, po ju bëj thirrje, nëpërmjet dhembshurisë së Perëndisë, ta paraqisni trupin tuaj si fli të gjallë, të shenjtëruar, të pëlqyer te Perëndia, që është shërbesa juaj e mënçur.

Romakëve 12:2 (ALB)
Dhe mos u konformoni me këtë botë, por transformohuni me anë të ripërtëritjes së mendjes suaj, që të provoni cili është i miri, i pëlqyeri dhe i përsosuri vullnet i Perëndisë.

Romakëve 12:3 (ALB)
Sepse, për hirin që më është dhënë, unë i them secilit prej jush të mos e vlerësojë veten më shumë se sa duhet ta çmojë, por të ketë një vlerësim të përkorë, sipas masës së besimit që Perëndia i ndau secilit.

Romakëve 12:4 (ALB)
Sepse, sikurse në një trup kemi shumë gjymtyrë dhe të gjitha gjymtyrët nuk kanë të njëjtën funksion,

Romakëve 12:5 (ALB)
kështu edhe ne, megjithse jemi shumë, jemi një trup në Krishtin dhe secili jemi gjymtyrë të njeri tjetrit.

Romakëve 12:6 (ALB)
Dhe tani, duke pasur dhunti të ndryshme sipas hirit që na u dha, nëse kemi profecinë, të profetizojmë sipas masës së besimit;

Romakëve 12:7 (ALB)
nëse kemi shërbim, le t’i kushtohemi shërbimit; po kështu mësuesi të jepet pas mësimit;

Romakëve 12:8 (ALB)
dhe ai që nxit, le t’i kushtohet nxitjes; ai që ndan, le ta bëjë me thjeshtësi; ai që kryeson le të kryesojë me zell; ai që bën vepra mëshirë, le t’i bëjë me gëzim.

Romakëve 12:9 (ALB)
Dashuria le të mos jetë me hipokrizi; urreni të keqen dhe ngjituni pas së mirës.

Romakëve 12:10 (ALB)
Duani njeri tjetrin me dashuri vëllazërore; në nderim tregoni kujdes njeri me tjetrin.

Romakëve 12:11 (ALB)
Mos u tregoni të përtuar në zell; jini të zjarrtë në frymë, shërbeni Perëndisë,

Romakëve 12:12 (ALB)
të gëzuar në shpresë, të qëndrueshëm në shtrëngime, këmbëngulës në lutje;

Romakëve 12:13 (ALB)
ndihmoni për nevojat e shenjtorëve, jini mikpritës.

Romakëve 12:14 (ALB)
Bekoni ata që ju përndjekin, bekoni dhe mos mallkoni.

Romakëve 12:15 (ALB)
Gëzohuni me ata që gëzohen, dhe qani me ata që qajnë.

Romakëve 12:16 (ALB)
Kini të njëjtat mendime njeri me tjetrin; mos lakmoni për lart, por rrini me të përunjurit; mos e mbani veten për të mënçur.

Romakëve 12:17 (ALB)
Mos ia ktheni kurrkujt të keqen me të keqe, kërkoni të bëni të mirën përpara gjithë njerëzve.

Romakëve 12:18 (ALB)
Po të jetë e mundur dhe aq sa varet prej jush, jetoni në paqe me gjithë njerëzit.

Romakëve 12:19 (ALB)
Mos u hakmerrni për veten tuaj, o të dashur, por i jepni vend zemërimit të Perëndisë, sepse është shkruar: “Mua më përket hakmarrja, unë kam për të shpaguar, thotë Zoti.”

Romakëve 12:20 (ALB)
“Në qoftë se armiku yt, pra, ka uri, jepi të hajë; në pastë etje, jepi të pijë; sepse, duke bërë këtë, do të grumbullosh mbi krye të tij thëngjij të ndezur.”

Romakëve 12:21 (ALB)
Mos u mund nga e keqja, por munde të keqen me të mirën.