Galatasve 4:1 (ALB)
Edhe them se për sa kohë trashëgimtari është i mitur, nuk dallohet fare nga skllavi, megjithëse është zot i të gjithave,

Galatasve 4:2 (ALB)
por ai është nën kujdestarë dhe administratorë deri në kohën e caktuar nga i ati.

Galatasve 4:3 (ALB)
Kështu edhe ne, sa ishim të mitur, ishim të robëruar nën elementet e botës,

Galatasve 4:4 (ALB)
por, kur u mbush koha, Perëndia dërgoi Birin e tij, të lindur prej gruaje, të nënshtruar ligjit,

Galatasve 4:5 (ALB)
që të shpengonte ata që ishin nën ligj, që ne të fitojmë birërinë.

Galatasve 4:6 (ALB)
Dhe, duke qenë se jeni bij, Perëndia dërgoi Frymën e Birit të tij në zemrat tuaja që thërret: “Abba, Atë!.”

Galatasve 4:7 (ALB)
Prandaj ti nuk je më shërbëtor, por bir; dhe në qoftë se je bir, je edhe trashëgimtar i Perëndisë me anë të Krishtit.

Galatasve 4:8 (ALB)
Por atëherë, duke mos njohur Perëndinë, u shërbyet atyre që prej natyre nuk janë perëndi;

Galatasve 4:9 (ALB)
kurse tani, mbasi njohët Perëndinë, më mirë të them se u njohët prej Perëndisë, vallë si ktheheni përsëri te elementet e dobët dhe të varfër, tek të cilët doni përsëri t’u nënshtroheni?

Galatasve 4:10 (ALB)
Sepse ju i kremtoni me kujdes disa ditë, muaj, stinë dhe vite.

Galatasve 4:11 (ALB)
Kam frikë se mos jam munduar më kot për ju.

Galatasve 4:12 (ALB)
O vëllezër, bëhuni si unë, sepse edhe unë jam si ju; ju lutem, o vëllezër, ju s’më keni bërë asnjë të keqe.

Galatasve 4:13 (ALB)
Dhe ju e dini se në të kaluarën unë ju predikova ungjillin me dobësi të mishit;

Galatasve 4:14 (ALB)
dhe ju nuk më përbuzët aspak dhe s’patët neveri për provën që ishte në mishin tim, por më pranuat si engjëll Perëndie, si Jezu Krishtin vet.

Galatasve 4:15 (ALB)
Cili ishte, pra, gëzimi juaj? Sepse unë dëshmoj për ju se, po të qe e mundur, ju do të nxirrnit edhe sytë tuaj dhe do të m’i jepnit mua.

Galatasve 4:16 (ALB)
A thua u bëra armiku juaj, duke ju thënë të vërtetën?

Galatasve 4:17 (ALB)
Ata tregohen të zellshëm ndaj jush, por jo për qëllime të ndershme; madje ata duan t’ju shkëputin që të jeni të zellshëm ndaj tyre.

Galatasve 4:18 (ALB)
Mirë është të jesh gjithnjë i zellshëm për të mirë, dhe jo vetëm kur ndodhem midis jush.

Galatasve 4:19 (ALB)
Djemtë e mi, që unë i lind përsëri, derisa të formohet Krishti në ju!

Galatasve 4:20 (ALB)
Do të doja tashti të isha midis jush dhe ta ndryshoja tingullin e zërit tim, sepse jam ndërdyshas ndaj jush.

Galatasve 4:21 (ALB)
Po më thoni, ju që doni të jeni nën ligj, a nuk e dëgjoni ligjin?

Galatasve 4:22 (ALB)
Sepse është shkruar se Abrahami pati dy bij: një nga shërbëtorja dhe tjetri nga e lira.

Galatasve 4:23 (ALB)
Dhe ai që lindi nga shërbëtorja lindi sipas mishit, por ai që lindi nga e lira lindi për hir të premtimit.

Galatasve 4:24 (ALB)
Këto gjëra kanë një kuptim alegorik, sepse këto dy gra janë dy besëlidhje: një nga mali Sinai, që ngjiz për skllavëri, dhe është Agari.

Galatasve 4:25 (ALB)
Dhe Agari është mali Sinai në Arabi dhe i përgjigjet Jeruzalemit të kohës së sotme; dhe ajo është skllave me bijtë e saj.

Galatasve 4:26 (ALB)
Ndërsa Jeruzalemi nga lart është i lirë dhe është nëna e ne të gjithëve.

Galatasve 4:27 (ALB)
Sepse është shkruar: “Gëzohu ti, o shterpë, që nuk lind! Shpërthe dhe klith, ti që nuk i provon dhembjet e lindjes, sepse bijtë e së braktisurës do të jenë më të shumtë se të asaj që e kishte burrin.”

Galatasve 4:28 (ALB)
Kurse ne, o vëllezër, jemi bij të premtimit, sikundër ishte Isaku.

Galatasve 4:29 (ALB)
Po, sikurse atëherë ai që lindi sipas mishit përndiqte atë që kishte lindur sipas Frymës, kështu është edhe tani.

Galatasve 4:30 (ALB)
Po çfarë thotë shkrimi? “Dëboje skllaven dhe djalin e saj, sepse i biri i skllaves nuk mund të jetë trashëgimtar bashkë me djalin e së lirës.”

Galatasve 4:31 (ALB)
Kështu, pra, vëllezër, ne nuk jemi bij të skllaves, por të së lirës.