Kolosianëve 2:1 (ALB)
Sepse dua që të dini ç’luftë të ashpër më duhet të bëj për ju, për ata që janë në Laodice dhe për të gjithë ata të cilët nuk e kanë parë fytyrën time personalisht,

Kolosianëve 2:2 (ALB)
që zemrat e tyre të ngushëllohen, duke u bashkuar në dashuri, dhe të kenë të gjitha pasuritë e sigurisë së plotë të zgjuarësisë për të njohur misterin e Perëndisë, e Atit dhe të Krishtit,

Kolosianëve 2:3 (ALB)
ku janë fshehur të gjitha thesaret e diturisë dhe të njohjes.

Kolosianëve 2:4 (ALB)
Dhe po ju them këtë, që askush të mos ju gënjejë me fjalë joshëse,

Kolosianëve 2:5 (ALB)
sepse, edhe pse me trup jam larg jush, me frymën jam bashkë me ju dhe gëzohem duke parë rregullin dhe qëndrueshmërinë e besimit tuaj në Krishtin.

Kolosianëve 2:6 (ALB)
Ashtu si e keni marrë Krishtin Jezus, Zotin, ashtu, pra, ecni në të,

Kolosianëve 2:7 (ALB)
duke pasur rrënjë dhe duke u ndërtuar në të, dhe duke u forcuar në besim ashtu sikurse ju mësuan, duke mbushulluar në të me falenderim.

Kolosianëve 2:8 (ALB)
Tregoni kujdes se mos ndokush ju bën prenë e tij me anë të filozofisë dhe me mashtrime të kota, sipas traditës së njerëzve, sipas elementeve të botës dhe jo sipas Krishtit,

Kolosianëve 2:9 (ALB)
sepse tek ai banon trupërisht gjithë plotësia e Hyjnisë.

Kolosianëve 2:10 (ALB)
Dhe ju keni marrë plotësinë në të, sepse ai është krye e çdo principate e pushteti,

Kolosianëve 2:11 (ALB)
në të cilin ju edhe u rrethpretë me një rrethprerje që nuk u bë me dorë, por me rrethprerjen e Krishtit, me anë të zhveshjes së trupit nga mëkatet e mishit:

Kolosianëve 2:12 (ALB)
të varrosur bashkë në të në pagëzim, ju edhe u ringjallët bashkë në të, me anë të besimit në fuqinë e Perëndisë që e ka ringjallur prej së vdekurish.

Kolosianëve 2:13 (ALB)
Dhe bashkë me të Perëndia ju dha jetë ju, që kishit vdekur në mëkate dhe në parrethprerjen e mishit, duke jua falur të gjitha mëkatet.

Kolosianëve 2:14 (ALB)
Ai e zhvlerësoi dokumentin e urdhërimeve, që ishte kundër nesh dhe ishte kundërshtar, dhe e hoqi nga mesi duke e mbërthyer në kryq;

Kolosianëve 2:15 (ALB)
dhe mbasi i zhveshi pushtetet dhe principatat, ua tregoi sheshit njerëzve, duke ngadhnjyer mbi ata në të.

Kolosianëve 2:16 (ALB)
Prandaj askush të mos ju gjykojë për ushqime ose pije, për festa o hënë të re, o të shtuna;

Kolosianëve 2:17 (ALB)
këto gjëra janë hija e atyre që kanë për të ardhur; por trupi është i Krishtit.

Kolosianëve 2:18 (ALB)
Askush të mos përvetësojë prej jush çmimin me pretekst përulësie dhe kulti të engjëjve, duke u përzier në gjëra që nuk i ka parë, i fryrë nga një krenari e kotë për shkak të mendjes së tij mishore,

Kolosianëve 2:19 (ALB)
dhe nuk mbahet te kryet, prej të cilit gjithë trupi, i ushqyer mirë dhe i lidhur i tëri me anë të nyjeve dhe të gjymtyrëve rritet me rritjen e Perëndisë.

Kolosianëve 2:20 (ALB)
Pra, në qoftë se vdiqët me Krishtin nga elementet e botës, përse u nënshtroheni disa rregullave, a thua se jetoni ende në botë, si:

Kolosianëve 2:21 (ALB)
“Mos prek, mos shijo, mos merr,”

Kolosianëve 2:22 (ALB)
të gjitha gjërat që prishen nga përdorimi, sipas urdhërimeve dhe mësimeve të njerëzve?

Kolosianëve 2:23 (ALB)
Këto gjëra kanë ndonjë dukje diturie në devotshmërinë e zgjedhur vullnetarisht, në përunjësinë e rreme dhe në trajtimin e ashpër të trupit, por nuk kanë asnjë vlerë kundër kënaqësisë së mishit.